تالعار اۋداندىق سوتىندا ءتورت جىل بۇرىن سپورتشىنى ۇرلاۋ جانە سوققىعا جىعۋ ىسىنە كۇدىكتى رەتىندە تانىلعان حاسان قاسىمبايەۆقا قاتىستى قىلمىستىق ءىس قارالا باستادى، دەپ حابارلايدى aqshamnews.kz
حاسان قاسىمبايەۆتىڭ ەسىمى ەلگە 2024 جىلعى 4 قازانعا قاراعان ءتۇنى تالعاردا "قاماجاي" دۇكەنىنىڭ ماڭىندا بولعان قاقتىعىسقا ۇلاسقان جانجالدان كەيىن بەلگىلى بولدى. داۋلى وقيعا 16 جاستاعى شەرزات پولاتتىڭ ولىمىمەن اياقتالعان ەدى. قوعامدا بۇل قىلمىسقا كىنالىلەر "حۋتورسكيە" دەگەن ۇيىمداسقان توپتىڭ مۇشەلەرى ەكەنى، ال ۇيىمنىڭ باسشىسى قاسىمبايەۆ ەكەندىگى جايلى الىپ-قاشپا ءسوز تاراعان بولاتىن. تۇرعىنداردىڭ ايتۋىنشا، بۇل توپ ايماقتى ۇرەيدە ۇستاعان، سوققىعا جىعۋ مەن قوقان-لوقى جاساۋ دەرەكتەرى دە بولعان. الايدا ىشكى ىستەر مينيسترلىگى مۇنداي توپتىڭ بار ەكەنىن جوققا شىعاردى، دەگەنمەن قاسىمبايەۆ قاماۋعا الىندى.
سوتقا دەيىن تەرگەۋ مۇددەسى ءۇشىن ءىستىڭ بارىسى تۋرالى اقپارات جاريالانباعان.
سوت پروسەسىنە جابىرلەنۋشىلەر مەن ايىپتالۋشىلاردىڭ تۋىستارى قاتىسۋدا، وقيعا ورنىندا جەدەل قىزمەتتەر كەزەكشىلىك اتقارۋدا.
ءىس قازاق تىلىندە، سۋديا ايناگۇل تۇقابايەۆانىڭ توراعالىعىمەن اشىق رەجيمدە وتۋدە.
ايتا كەتسەك، حاسان قاسىمبايەۆقا بىردەن ءۇش باپ بويىنشا ايىپ تاعىلدى: ادام ۇرلاۋ، قاساقانا اۋىر دەنە جاراقاتىن كەلتىرۋ جانە قورقىتۋ. ول 2024 جىلعى 2 قاراشادا ۇستالعان.
ونىمەن بىرگە تاعى بەس ادام ايىپتالۋشىلار ورىندىعىندا وتىر.
جابىرلەنۋشىلەر قاتارىندا ەكى ادام، ازىرگە ولاردىڭ جەكە دەرەكتەرى جاريا ەتىلمەگەن.
ايتا كەتسەك، تالعاردا "حۋتورسكيە" دەگەن ۇيىمداسقان قىلمىستىق توپتىڭ باسشىسى رەتىندە تانىلعان حاسان قاسىمبايەۆتىڭ ۇستالعانى 2024 جىلعى 4 قاراشادا بەلگىلى بولدى. كەيىن الماتى وبلىسى پد ول ۋاقىتشا ۇستاۋ يزولياتورىنا "قاساقانا اۋىر دەنە جاراقاتىن كەلتىرۋگە جانە مما سپورتشىسى ارمان ءالىمۇلىن ۇرلاۋعا قاتىسى بار" دەگەن كۇدىكپەن قامالعانىن ناقتىلادى. تامىز ايىنىڭ باسىندا تەرگەۋ اياقتالدى.