باقىتگۇلدىڭ ءوز باسپاناسى دا جوق
31 قازاندا اتىراۋ وبلىسى اكىمىنىڭ ەكس-ورىنباسارى باقىتگۇل حامەنوۆانىڭ ءىسى بويىنشا وتكەن كەزەكتى سوت وتىرىسىندا تاراپتاردىڭ ءجارىسسوزى تىڭدالدى، دەپ حابارلايدى Almaty-akshamy.kz «اق جايىق» گازەتىنە سىلتەمە جاساپ.
مەملەكەتتىك ايىپتاۋشى لاۋرا اسانوۆا سوتتالۋشى رىسقالييەۆتىڭ سوتتا بەرگەن ەكى ءتۇرلى ايعاعى بىر-بىرىنە قايشى بولعانىن جانە رىسقالييەۆتىڭ انتيكور قىزمەتكەرلەرى «ينسترۋكتاج وتكىزدى» دەگەن سوزىنە دالەل بولماعانىن العا تارتتى. بۇدان باسقا، حامەنوۆاعا قاتىستى تەرگەۋ ماتەريالدارى مەن اۋديوجازبالارداعى «ماناعىعا وتە ساق بول»، ت.ب. سوزدەر پاراعا قاتىستى ەكەنىن بىلدىرەتىنىن جەتكىزدى.
بۇدان كەيىن حامەنوۆانىڭ قورعاۋشىسى ءارى ءىنىسى ارمان حامەنوۆ ءسوز الدى.
«باقىتگۇل 10 ايدان بەرى انتيكوردىڭ قيالىنان تۋعان جالانىڭ زاردابىن تارتىپ كەلەدى. ءبىز اكە-شەشەمىزدىڭ تاربيەسىن كورىپ، اكەمىزدىڭ «ىستەگەندى مويىندا، ادال جولمەن ءجۇر» دەگەن تاربيەسىمەن ءجۇرىپ كەلەمىز. ەگەر باقىتگۇل پارا العان ادام بولسا، وسىلاي اعايىن-تۋىستارى بولىپ، ونى قولداۋعا كەلەر مە ەدىك؟ بىرەۋگە كۇلكىلى بولار، ءبىراق شىنىن ايتقاندا، باقىتگۇلدىڭ ءوز باسپاناسى دا جوق. اتىراۋدا قىزمەتتىك پاتەردە تۇردى، استانادا پارلامەنت ۇيىندە تۇردى»، - دەدى ءىنىسى.
بۇدان كەيىن حامەنوۆا سوتقا بولعان جايتقا قاتىستى 40 بەتتەن تۇراتىن ءوزىنىڭ ءۋاجىن جەتكىزدى.
«بۇل باسسىزدىق مەن ءۇشىن جانە مەنىڭ تۋىستارىم ءۇشىن اسا قۇندى ابىرويىمدى اياق استى ەتتى، جاقىندارىمنىڭ دەنساۋلىعىن ناشارلاتتى. ەڭ سوراقىسى - ناۋقاس اناما جانە بالالارىما ارناۋعا ءتيىستى ۋاقىتىمدى ۇرلادى. “حامەنوۆانىڭ اداموۆتان پارا الۋ نيەتى بولدى جانە پارانى رىسقالييەۆ ارقىلى تالاپ ەتتى” دەگەن ايىپ جالاڭ ءسوز عانا»، - دەدى ب.حامەنوۆا.
تاراپتاردىڭ جارىسسوزىنەن كەيىن سوت ءتوراعاسى جۇماعالي تاشيموۆ كەلەسى وتىرىستى 14 قاراشاعا قالدىردى.
ەسكە سالايىق، بۇعان دەيىن ايىپتاۋشى تاراپ سوتتان حامەنوۆا مەن رىسقالييەۆتى مۇلكىن تاركىلەپ، 7 جىلعا باس بوستاندىعىنان ايىرۋدى جانە ءومىر بويىنا مەملەكەتتىك قىزمەت اتقارۋ قۇقىعىنان ايىرۋدى، ال پارا بەردى دەپ ايىپتالعان كاسىپكەر ۋ.اداموۆتى 4،5 جىلعا باس بوستاندىعىنان ايىرۋدى سۇراعان بولاتىن.