حالىقتىڭ تابىسىن ارتتىرۋعا 197 ملرد تەڭگە جۇمسالادى. بۇل تۋرالى بۇگىن ۇكىمەت وتىرىسىندا ق ر پرەمەر-مينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
ونىڭ اتاپ وتۋىنشە، 2022 جىلعا ارنالعان رەسپۋبليكالىق بيۋدجەتتى ناقتىلاۋ تۋرالى زاڭ جوباسىندا حالىقتىڭ تابىسىن ارتتىرۋعا باعىتتالعان جالپى شىعىستار 197 ملرد تەڭگەنى قۇرايدى. وسى قاراجات اياسىندا جاستاردى قولداۋ، ءوز بيزنەسىن اشۋ ءۇشىن ميكروكرەديتتەر بەرۋ، جالعا الىنعان تۇرعىن ءۇي ءۇشىن تولەمنىڭ ءبىر بولىگىن سۋبسيديالاۋ جانە حالىقتىڭ ناقتى تابىسىن ارتتىرۋعا باعىتتالعان باسقا دا ماڭىزدى ءىس-شارالار قامتاماسىز ەتىلەدى. ال ازىق-تۇلىك قاۋىپسىزدىگىن قامتاماسىز ەتۋ جوسپارى اياسىنداعى ءىس-شارالارعا 238 ملرد تەڭگە جۇمسالادى.
«قوسىمشا قاراجات اگروونەركاسىپتىك كەشەندى سۋبسيديالاۋعا، كوكتەمگى ەگىس جانە ەگىن جيناۋ جۇمىستارىنا جەڭىلدىكپەن كرەديت بەرۋ كولەمىن ۇلعايتۋعا جانە اۋىل شارۋاشىلىعىنداعى باسقا دا ماسەلەلەردى شەشۋگە باعىتتالاتىن بولادى»، - دەدى ەرۇلان جاماۋبايەۆ.
سونىمەن قاتار، ونىڭ ايتۋىنشا، جالپى سوماسى 476 ملرد تەڭگە بولاتىن قوسىمشا شىعىستار وڭىرلەردى دامىتۋعا بولىنەدى.
«اتالعان شىعىستاردىڭ 271 ملرد تەڭگەسى نەمەسە 57 پايىزى باتىس جانە وڭتۇستىك وڭىرلەردى دامىتۋعا باعىتتالعان. جالپى العاندا، ناقتىلاۋدى ەسكەرە وتىرىپ، وڭىرلەرگە رەسپۋبليكالىق بيۋدجەتتەن 5،5 ترلن تەڭگەدەن استام قاراجات نەمەسە جالپى شىعىستاردىڭ 29،3 پايىزى باعىتتالاتىن بولادى. سونداي-اق، قوسىمشا قاراجات اياسىندا ينفلياسيا ءدالىزىنىڭ وزگەرۋىنە بايلانىستى الەۋمەتتىك تولەمدەردى يندەكستەۋگە ارنالعان شىعىستار كوزدەلگەن. بۇل 110 ملرد تەڭگەدەن اسادى»، - دەدى ەرۇلان جاماۋبايەۆ.
ءمينيستردىڭ ايتۋىنشا، وسىلايشا بيۋدجەت تۇسىمدەرى 15،8 ترلن تەڭگەنى نەمەسە جالپى ىشكى ونىمگە 17،3 پايىزدى قۇرايدى. شىعىستار 18،8 ترلن تەڭگە نەمەسە جالپى ىشكى ونىمگە 20،5 پايىز دەڭگەيىندە بولجانىپ وتىر.
«بيۋدجەت تاپشىلىعى بۇرىن بەكىتىلگەن دەڭگەيدە ساقتالدى. بارلىق جوسپارلانعان شارالار ەكونوميكا مەن وڭىرلەردىڭ دامۋىنا سەرپىن بەرەدى، حالىق تابىسىنىڭ ءوسۋىن قامتاماسىز ەتۋى جانە ازاماتتاردىڭ ءومىر ءسۇرۋ ساپاسىن جاقسارتۋى ءتيىس»، - دەدى ول.