الماتى اكىمدىگى كوممۋنالدىق تاريفتەر بويىنشا حالىقتىڭ الەۋمەتتىك وسال توپتارى ءۇشىن قوسىمشا قولداۋ شارالارىن ەنگىزۋدى جوسپارلاۋدا
الماتى قالاسىنىڭ اكىمى ەربولات دوسايەۆتىڭ تاپسىرماسى بويىنشا حالىقتىڭ الەۋمەتتىك وسال توپتارى ءۇشىن كوممۋنالدىق قىزمەتتەرگە تاريفتەردى كوتەرۋگە وتەماقى تولەۋ الگوريتمى ازىرلەندى. بۇل تۋرالى باسپا ءسوز كونفەرەنسياسىندا الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ مالىمدەدى، دەپ حابارلايدى almaty-akshamy.kz
اكىمدىكتىڭ قوسىمشا تولەمدەردى ەنگىزۋ جونىندەگى باستاماسى اعىمداعى جىلدىڭ 1 شىلدەسىنەن باستاپ توزىعى جەتكەن جەلىلەردىڭ پروبلەماسىن شەشۋ ءۇشىن قاجەت كوممۋنالدىق قىزمەتتەرگە تاريفتەردىڭ كوتەرىلۋىمەن تۇسىندىرىلەدى جانە "تاريفتەر -ينۆەستيسيالارعا"جالپىحالىقتىق قاعيداتى اياسىندا ەنگىزىلەدى.
"ءبىز كوممۋنالدىق ينفراقۇرىلىمنىڭ ابدەن توزۋى اياسىندا ءتاريفتى كوتەرۋدىڭ ۇلكەن قاجەتتىلىگى بار ەكەنىن تۇسىنەمىز، ءبىراق بۇل رەتتە الماتى اكىمدىگى ءۇشىن حالىقتىڭ الەۋمەتتىك وسال توپتارىن قولداۋ ءارقاشان باسىمدىققا يە. 2023 جىلدىڭ مامىر ايىنان باستاپ الماتى اكىمىنىڭ تاپسىرماسى بويىنشا ءبىز حالىقتىڭ الەۋمەتتىك وسال توپتارىن قولداۋ ءۇشىن وتەماقى الگوريتمىن ازىرلەۋدى باستادىق، ونى قالا ءماسليحاتى دا قولدايدى دەگەن سەنىمدەمىز"، - دەدى ب.جاۋباسوۆ.
حالىقتىڭ الەۋمەتتىك قورعالماعان ساناتتارىنا قولداۋ شارالارىن كورسەتۋ ماقساتىندا اعىمداعى جىلدىڭ سوڭىنا دەيىن 316 388 تۇرعىنعا وتەماقى تولەۋ جوسپارلانۋدا (ودان ءارى ۇزارتۋ 2024 جىلعى بيۋدجەتتى ەسكەرە وتىرىپ قارالاتىن بولادى). الەۋمەتتىك كومەك مولشەرى 0،5 اەك قۇرايدى. قۇجاتتاردى قابىلداۋدى جانە تولەۋدى اۋداندىق اكىمدىكتەر ءوتىنىش بەرۋشىلەردىڭ شوتتارىنا ەكىنشى دەڭگەيدەگى بانكتەر ارقىلى جۇرگىزەتىن بولادى.
ماسەلەن، جەكە تۇلعالار ءۇشىن ءتاريفتىڭ ءوسۋى تۇبىرتەك بويىنشا كولەمى 70 شارشى مەتر پاتەردە ورتاشا ەسەپپەن 10%-دى قۇرايدى. 0،5 اەك مولشەرىندەگى وتەماقى 12 پوزيسياعا (سۋمەن جابدىقتاۋ، سۋ بۇرۋ، گاز، جىلىتۋ جانە ت.ب.) تاريفتەردىڭ كوتەرىلۋ ايىرماسىن، ياعني بارلىق 100% ءوسىمدى جاباتىن بولادى. 40 شارشى مەترلىك كولەمنەن – 110%.
وسىلايشا، اكىمدىك 12 پوزيسياعا (سۋمەن جابدىقتاۋ، سۋ بۇرۋ، گاز، جىلىتۋ جانە ت.ب.) اعىمداعى جانە جوعارى تاريفتەر اراسىنداعى ايىرماشىلىقتى جابۋدى جوسپارلاۋدا. وسى ماقساتتارعا بارلىعى 2،7 ملرد تەڭگە بولىنەدى.
قازىرگى كەزدە "مۇقتاج ازاماتتاردىڭ جەكەلەگەن ساناتتارىنا كوممۋنالدىق قىزمەتتەرگە تاريفتەردىڭ ءوسۋىن وتەۋگە الەۋمەتتىك كومەك كورسەتۋ قاعيدالارىنىڭ" جوباسى الماتى قالاسى ءماسليحاتىنىڭ كەلىسىمىنە ۇسىنىلعان. الگوريتمگە سايكەس قۇجات نقا پورتالىندا ورنالاستىرىلادى، قوعامدىق ساراپتاما الۋ راسىمدەرى ساقتالادى.
انىقتاما: الماتىدا حالىقتىڭ الەۋمەتتىك وسال توپتارى ساناتىنا جاتاتىن 316 388 ازامات تۇرادى، ونىڭ ىشىندە ۇوس ارداگەرلەرى - 54 ادام (0،02%)؛ باسقا مەملەكەتتەر اۋماعىنداعى جاۋىنگەرلىك ءىس - قيمىل ارداگەرلەرى - 2978 ادام (0،94%)؛ جەڭىلدىكتەر بويىنشا ۇوس ارداگەرلەرىنە تەڭەستىرىلگەندەر -1538 ادام (0،48%)؛ ءبىرىنشى جانە ەكىنشى توپتاعى مۇگەدەكتەر - 28 433 ادام (8،9%)؛ مۇگەدەك بالالارى بار نەمەسە تاربيەلەپ وتىرعان وتباسىلار – 8591 ادام( 2،71%)؛ "التىن القاجانە، "كۇمىس القامەن" ماراپاتتالعان كوپبالالى انالار، كوپبالالى وتباسىلار – 35562 (11،2%)؛ مەملەكەتتىك نەمەسە قوعامدىق مىندەتتەردى، اسكەري قىزمەتتى اتقارۋ كەزىندە، عارىش كەڭىستىگىنە ۇشۋدى دايىنداۋ نەمەسە جۇزەگە اسىرۋ كەزىندە، ادام ءومىرىن قۇتقارۋ كەزىندە، قۇقىقتىق ءتارتىپتى قورعاۋ كەزىندە قازا تاپقان (قايتىس بولعان) ادامداردىڭ وتباسىلارى - 534 ادام (0،16%)، جاسى بويىنشا زەينەتكەرلەر - 237 740 ادام (75،1%).
ايتا كەتەيىك، 2023 جىلعى جاعداي بويىنشا الماتىدا جىلۋ جەلىلەرى 59،2%، سۋ قۇبىرلارى 54،4%، كارىز جەلىلەرى 57،4% توزعان.