ەڭبەك مينيسترلىگى «جۇمىس كۇشىنىڭ ۇتقىرلىعىن ارتتىرۋ ءۇشىن ادامداردىڭ ەرىكتى تۇردە قونىس اۋدارۋ قاعيدالارىن بەكىتۋ تۋرالى» بۇيرىعىنا وزگەرىستەر ەنگىزبەك، دەپ حابارلايدى Almaty-akshamy.kz Inform.kz-كە سىلتەمە جاساپ.
«اشىق» نقا پورتالىندا جاريالانعان قۇجاتتا حالىقتى جۇمىسپەن قامتۋ ورتالىقتارى ەڭبەك ۇتقىرلىعى ورتالىقتارى بولىپ قايتا قۇرىلاتىنى جازىلعان. سونىمەن قاتار، ورگاننىڭ قىزمەت قۇزىرەتى كەڭەيەدى.
«الەۋمەتتىك كودەكستىڭ قابىلداۋىنا بايلانىستى جۇمىس ناتيجەسى بويىنشا مامانداردى قوسىمشا ىنتالاندىرۋ ءۇشىن «حالىقتى جۇمىستى قامتۋ ورتالىقتارى ەڭبەك ۇتقىرلىعى ورتالىعى بولىپ قايتا قۇرىلادى. ەڭبەك ۇتقىرلىعى ورتالىعى - جۇمىسپەن قامتۋعا جاردەمدەسۋ شارالارىن ازىرلەۋ جانە ىسكە اسىرۋ ماقساتىندا وبلىستىڭ، رەسپۋبليكالىق ماڭىزى بار قالانىڭ جانە استانانىڭ جەرگىلىكتى اتقارۋشى ورگانى»، - دەلىنگەن قۇجاتتا.
بۇيرىقتا كورسەتىلگەندەي، ەڭبەك ۇتقىرلىعى ورتالىعىنىڭ اۋدان، وبلىس جانە رەسپۋبليكالىق ماڭىزى بار قالالارداعى فۋنكسياسىن اتقاراتىن فيليالدارى مانساپ ورتالىعى بولىپ اتالادى.
مانساپ ورتالىقتارى مىناداي ساناتتاعى ازاماتتاردى جۇمىسپەن قامتيدى:
- جۇمىس ىزدەگەن ادامداردى؛
- جۇمىسسىزداردى؛
- جۇمىسپەن قامتىلعان ادامداردىڭ جەكەلەگەن ساناتتارى جانە ولاردىڭ وتباسى مۇشەلەرىنىڭ جاڭا تۇرعىلىقتى جەرگە ەرىكتى تۇردە قونىس اۋدارۋىنا جاردەمدەسەدى؛
- قانداستارعا كومەك كورسەتەدى.
ايتا كەتەيىك، قولدانىستاعى بۇيرىقتىڭ تالابى بويىنشا حالىقتى جۇمىسپەن قامتۋ ورتالىقتارى قانداستاردى جۇمىسپەن قامتۋ شارالارىن جۇزەگە اسىرمايدى.