دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحانوم گەبرەيسۋس مايمىل شەشەگىنىڭ ءورشۋى الەم بويىنشا دەنساۋلىق سالاسىن توتەنشە جاعدايعا اكەلىپ سوقتىرعانىن مالىمدەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
رەسمي مالىمەتكە سايكەس، الەم بويىنشا 16 مىڭ ادام مايمىل شەشەگىن جۇقتىرعانى انىقتالدى. اسىرەسە، ەۋروپا ايماعىندا ىندەتتىڭ تارالۋ ءقاۋپى جوعارى.
بۇعان دەيىن Reuters سەنىمدى اقپارات كوزدەرىنە سىلتەمە جاساي وتىرىپ، دۇنيەجۇزىلىك دەنساۋلىق ساقتاۋ ۇيىمىنىڭ ساراپشىلارى مايمىل شەشەگىنە قاتىستى ءبىر شەشىمگە كەلمەگەنىن حابارلادى. مامانداردىڭ ءبىر توبى الەمدىك اۋقىمداعى توتەنشە جاعداي جاريالاۋدىڭ قاجەتى جوق دەپ شىقتى. الايدا ۇيىم باسشىسى مايمىل شەشەگىنىڭ حالىقارالىق دەڭگەيدە ءقاۋىپ ءتوندىرىپ تۇرعانىنا سەنىمدى.
23 شىلدە كۇنى جەنيەۆا قالاسىندا ددسۇ توتەنشە كوميتەتىنىڭ ەكىنشى وتىرىسى ءوتتى. سونىڭ قورىتىندىسى بويىنشا وتكەن باسپا ءسوز ءماسليحاتىندا تەدروس ادحانوم گەبرەيسۋس مالىمدەمە جاسادى.
«مەن مايمىل شەشەگىنىڭ جاھاندىق دەڭگەيدە ءورشۋى قوعامدىق دەنساۋلىق ساقتاۋ سالاسىنداعى حالىقارالىق ماڭىزى بار توتەنشە جاعداي دەپ سانايمىن»، - دەدى گەربەيسۋس.
ۇيىم باسشىسى كوميتەت مۇشەلەرىنىڭ وسى ماسەلە بويىنشا ءبىر كەلىسىمگە كەلمەگەنىن دە اشىق ايتتى. 9 ساراپشى قارسى بولسا، جەتەۋى قولداۋ ءبىلدىردى.
ايتا كەتەرى، ددسۇ حالىقارالىق ماسشتابتاعى توتەنشە جاعدايدى 2020 جىلى كوروناۆيرۋستىڭ تارالۋىنا بايلانىستى جاريالاعان بولاتىن.