الماتى قالاسىنىڭ ءبىلىم بەرۋ جۇيەسىن دامىتۋداعى 2023-2030 جىلدارعا ارنالعان وڭىرلىك جول كارتاسى نەگىزىندە الماتى ەلەكترومەحانيكا كوللەدجىنىڭ ەنەرگەتيكا سالاسىندا شەبەرحانا مەڭگەرۋشىسى رەتىندە 2023 جىلدىڭ كۇز ايىندا برازيليا مەملەكەتىندە ەلەكتر-ەنەرگەتيكا سالاسى بويىنشا حالىقارالىق تاعىلىمدامادان ءوتىپ كەلدىم. بۇل تاعىلىمداما ماعان الەمدىك دەڭگەيدەگى جاڭا تەحنولوگيالاردى مەڭگەرۋگە، الدىڭعى قاتارلى وندىرىستىك تاجىريبەنى زەرتتەۋگە جانە زاماناۋي ادىستەردى وقۋ پروسەسىنە ەنگىزۋگە زور مۇمكىندىك بەردى.
حالىقارالىق تاجىريبە مەن ءوزىمنىڭ كاسىبي جۇمىسىمدا جيناقتاعان ءبىلىمىمدى سارالاي وتىرىپ، ءبىلىم الۋشىلارىمىزعا قازىرگى زامانعا ساي تەحنولوگيالاردى جانە باعدارلامالاردى بىرىكتىرىپ، SMART PRODUCTIONS (اقىلدى ونەركاسىپ) جوباسى اياسىندا ءبىلىم بەرۋدى ماقسات تۇتتىم. بۇل جوبا – ونەركاسىپ پەن زاۋىتتاردى زاماناۋي قۇرىلعىلارمەن جانە باعدارلامالار ارقىلى باسقارۋدىڭ يننوۆاسيالىق ءتاسىلى. جالپى، SMART PRODUCTIONS جۇيەسى ءۇش نەگىزگى باعىتتا جۇمىس ىستەيدى: ءوندىرىستى ىسكە قوسۋ، باسقارۋ جانە رەتتەۋ؛ ءوندىرىس بارىسىن باقىلاۋ؛ اقاۋلاردى انىقتاپ، جوندەۋ جۇمىستارىن جۇرگىزۋ.
تاعىلىمداما بارىسىندا الەمنىڭ الدىڭعى قاتارلى زاۋىتتارى مەن كاسىپورىندارىندا قولدانىلاتىن تەحنولوگيالاردى زەرتتەپ، ولاردىڭ تيىمدىلىگىن كوزبەن كوردىم. بۇگىن دە ءوندىرىس ورىندارى تولىق اۆتوماتتاندىرىلعان جۇيەلەرگە كوشىپ، وندىرىستىك پروسەستەردى ساندىق فورماتتا باسقارۋ مۇمكىندىگىنە يە. بۇل وزگەرىستەر قازاقستاننىڭ تەحنيكالىق جانە كاسىپتىك ءبىلىم بەرۋ جۇيەسىندە دە ءوز ورنىن تابۋى ءتيىس دەپ ەسەپتەيمىن.
مەن قازىرگى تاڭدا SMART PRODUCTIONS جۇيەسى نەگىزىندە ءبىلىم بەرۋ ارقىلى ستۋدەنتتەرىمىزگە زاماناۋي ءوندىرىستىڭ تالاپتارىنا ساي داعدىلاردى مەڭگەرتۋدى كوزدەپ وتىرمىن. جوبامنىڭ باستى ماقساتى – وندىرىستەگى اۆتوماتتاندىرىلعان باسقارۋ جۇيەلەرىن، سمارت-تەحنولوگيالاردى جانە جاساندى ينتەللەكت مۇمكىندىكتەرىن قولدانىپ، كاسىبي بىلىكتى ماماندار دايارلاۋ.
وسى تاقىرىپتى وقۋ باعدارلاماسىنا ەنگىزىپ، ستۋدەنتتەر مەن وندىرىستىك وقىتۋ شەبەرلەرىنە ارنايى كۋرستار مەن تاجىريبەلىك ساباقتار ۇيىمداستىرىپ SMART PRODUCTIONS جۇيەسىنىڭ نەگىزدەرىن جان-جاقتى ءتۇسىندىرىپ ۇيرەتۋدەمىن. وسىلايشا، زاماناۋي تەحنولوگيالاردى مەڭگەرگەن مامانداردى دايارلاۋ ءىسى قارقىندى جۇزەگە اسىرىلۋدا. وسى جۇمىسىمىز ەل پرەزيدەنتى ق.ج.توقايەۆتىڭ «2025-جۇمىسشى ماماندىقتار جىلى» باعدارلاماسىنا تۇسپا-تۇس كەلۋىنىڭ ءوزى SMART PRODUCTIONS جوباسى اياسىندا كاسىبي ءبىلىم بەرۋ جۇيەسىندە جاڭا مۇمكىندىكتەر اشىپ، ستۋدەنتتەرگە زاماناۋي وندىرىستىك ستاندارتتارعا ساي داعدىلاردى ۇيرەتۋگە زور ىقپال ەتۋدە.
وسى سالانىڭ مامانى رەتىندە بولاشاقتا وقۋ ورنىمىزداعى زەرتحانالار مەن وندىرىستىك الاڭداردى جاڭعىرتۋ، يننوۆاسيالىق جوبالاردى جۇزەگە اسىرۋ، سونداي-اق ستۋدەنتتەردىڭ تاجىريبەلىك ءبىلىمىن شىڭداۋ باعىتىندا قارقىندى جۇمىس جۇرگىزلىپ، ەلىمىزدىڭ ونەركاسىبىنە جاڭاشىل، باسەكەگە قابىلەتتى ماماندار دايارلاۋدا الماتى ەلەكترومەحانيكا كوللەدجى الدىڭعى قاتاردان كورىنەتىنىنە سەنىمدىمىن!
نالجىگىت بەكنۇر مۇرات ۇلى
“الماتى ەلەكترومەحانيكا كوللەدجى” كمقك،
شەبەرحانا مەڭگەرۋشىسى