قالامىزداعى مەملەكەتتىك قۋىرشاق تەاترى V حالىقارالىق «Balausa» ەكسپەريمەنتالدى سپەكتاكلدەر فەستيۆالىنە قاتىسادى. بيىل بەسىنشى رەت ۇيىمداستىرىلىپ وتىرعان فەستيۆال اعىمداعى جىلدىڭ ءساۋىر ايىنىڭ 20-25 جۇلدىزى ارالىعىندا وتەدى دەپ جوسپارلانىپ وتىر.
ءوز تاريحىنىڭ 87ء-شى جىلىنا قادام باسقان ونەر ۇجىمى شىعارماشىلىق تىنىسىن كەڭەيتۋدە ءتۇرلى تەاتر فەستيۆالدەرىنە قاتىسىپ، رەسپۋبليكالىق، حالىقارالىق دەڭگەيدە قۋىرشاق ونەرىنىڭ بەدەلىن ارتتىرىپ كەلەدى. كۇللى قازاق تەاتر ونەرىنە ارتىلار جۇكتى تەڭ كوتەرىپ كەلە جاتقان ونەر ۇجىمى ەلىمىزدەگى ەكى جىلدىق شەكتەۋلەرگە قاراماستان، بىرنەشە ونەر فەستيۆالىنە قاتىسىپ، كاسىبي دەڭگەيىن ارتتىرۋدا جۇيەلى جۇمىس جاساپ كەلەدى. بيىلعى جىلى دا قۋىرشاق ونەرىنىڭ قارا شاڭىراعى بىرنەشە تەاتر فەستيۆالىنە شاقىرتۋ الىپ وتىر. سولاردىڭ ءبىرى ءارى بىرەگەيى – اقتوبە قالاسىندا ت.احتانوۆ اتىنداعى دراما تەاترى ۇيىمداستىرىپ وتىرعان V حالىقارالىق «BALAUSA» ەكسپەريمەنتالدى سپەكتاكلدەر فەستيۆالى.
فەستيۆال اياسىندا ەلىمىزدەگى 40-تان اسا تەاترلار ءوتىنىمىنىڭ اراسىنان ەڭ ۇزدىك سپەكتاكلدەردىڭ باسىن قوسىپ، زاماناۋي تەاتر كەڭىستىگىندەگى جاڭا تاجىريبەلەردى ساراپتايدى. اتالمىش فەستيۆالدە شەتەلدىك تەاتر ساراپشىلارى قازىلىق ەتىپ، جاڭاشىلدىققا ۇمتىلعان ونەر ۇجىمىنىڭ تالپىنىستارىن كاسىبي تالداۋدان وتكىزەدى. ونەر دوداسىنا مەملەكەتتىك قۋىرشاق تەاترىنىڭ رەپەرتۋارىنداعى ەرەسەكتەرگە ارنالعان «ماكبەت.يلليۋزيا» (رەجيسسەرى: دينا جۇمابايەۆا) سپەكتاكلى شاقىرتۋ الىپ وتىر. 2021 جىلدىڭ اقپان ايىندا جارىق كورگەن الەم كلاسسيكاسى بۇگىنگە دەيىن كاسىبي تەاتر سىنشىلارىنىڭ جوعارى باعاسىنا يە بولىپ، «سىنشىلار جۇلدەسى – 2021» ناتيجەسىندە ۇزدىكتەر قاتارىنان كورىنگەن بولاتىن. سپەكتاكلدە ادامزاتقا ورتاق ماسەلەنى ءبىر وتباسىنىڭ تاعدىرىمەن سۋرەتتەگەن اعىلشىن دراماتۋرگى ۋيليام شەكسپيردىڭ كەيىپكەرلەرى العاش رەت قۋىرشاق بەينەسىندە ءتىل قاتادى.
سپەكتاكل رەجيسسەرى دينا جۇمابايەۆا پەسا جەلىسىندەگى شوتلاندىق كورولدىڭ تاريحي وقيعاسىنان بۇرىن جانۇياداعى ەر مەن ايەل تراگەدياسىن ءبىرىنشى ورىنعا شىعارىپ، شىعارماعا وزىندىك ينتەرپرەتاسيا جاساي بىلگەن. ساحنا كەڭىستىگىن يگەرۋدىڭ جاڭا فورماسىن جاساۋعا دەگەن رەجيسسەر تالپىنىسى دا ءساتتى شىققان. كاسىبي ءارى كوركەم ويلاردان تۇراتىن سپەكتاكل ونەر بايگەسىندە لايىقتى ورنىن تاۋىپ، كاسىبي باعاسىن الادى دەپ سەنەمىز.