الماتىدا ءال-فارابي داڭعىلىنىڭ سولتۇستىك جاعىندا ەسەنتاي وزەنىندەگى ۆەلوسيپەدشىلەر مەن جۇرگىنشىلەرگە ارنالعان كوپىردىڭ قۇرىلىسى جالعاسىپ جاتىر، دەپ حابارلايدى aqshamnews.kz
ال وڭتۇستىك بەتتەگى جۇرگىنشىلەر كوپىرىنىڭ قۇرىلىسى ءىس جۇزىندە اياقتالعان. بۇل تۋرالى الماتى قالالىق جول ينفراقۇرىلىمىن دامىتۋ باسقارماسىنىڭ وكىلدەرى ايتتى.
جاقىندا ديامەترى 800 مم ماگيسترالدىق سۋ قۇبىرىن قايتا سالۋ جانە تىرەكتەردى ورناتۋ ءۇشىن شۇڭقىر قازۋ جۇمىستارى باستالادى.
جوبا اياسىندا اعاش كەسۋ جوسپارلانعان، ونىڭ ىشىندە 14 اپاتتى جاعدايداعى اعاش بار. سونداي-اق، 12 جوكە اعاشى باسقا جەرگە كوشىرىلەدى. سونىمەن قاتار، ىرگەلەس اۋماقتى كورىكتەندىرۋ اياسىندا بۇل ۋچاسكەدە 80 ءىرى كولەمدى اعاش جانە شامامەن 50 بۇتا ەگۋ كوزدەلگەن. بيىل كوكتەمدە كەسىلگەن اعاشتاردىڭ ورنىنا قوسىمشا تاعى 580 اعاش ەگۋ جوسپارلانىپ وتىر.
«كوپىردىڭ اۆتوجول بولىگى 2023 جىلى قايتا جاڭعىرتىلعان بولاتىن. ال ۆەلو جۇرگىنشىلەر ينفراقۇرىلىمىنىڭ باستاپقى جوباسىندا 135 اعاش كەسۋ قاراستىرىلعان ەدى، بۇل قالا تۇرعىندارىنىڭ نارازىلىعىن تۋدىردى. وسىعان بايلانىستى اكىمدىك جوبانى وزگەرتۋ، كوپىرلەردى اۆتوجول بولىگىنە جاقىنداتۋ جانە ينجەنەرلىك جەلىلەردى كوشىرۋ تۋرالى شەشىم قابىلدادى. ەندى وڭتۇستىك جاقتاعى 26 اعاش كەسىلەدى. ءبىز ءاربىر اعاشتىڭ، اسىرەسە قايتا ەگىلەتىندەردىڭ جاعدايىن ءجىتى باقىلاۋدا ۇستايمىز. جالپى، جوبانى بيىل تامىز ايىندا اياقتاۋ جوسپارلانىپ وتىر، ال كورىكتەندىرۋگە قاتىستى قانداي دا ءبىر ەسكەرتۋ بولسا، مەردىگەر ولاردىڭ بارلىعىن تۇزەتەدى»، — دەدى قوعام بەلسەندىسى، «جاسىل كوميسسيا» مۇشەسى ومار نۇرحايداروۆ.