بيىل ەلىمىزدىڭ قارۋلى كۇشتەرى 34 بايقاۋدىڭ جەتەۋىنە قاتىسىپ، ءتورت «التىن» جانە ءبىر «كۇمىس» جۇلدە ولجالادى
قارۋلى كۇشتەردىڭ ۇلتتىق اسكەري-پاتريوتتىق ورتالىعىندا تانكيستەر كۇنىنە ارنالعان سالتاناتتى جيىن ءوتتى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
اسكەر ساپىنداعى تانكيستەر مەن ارداگەلەردى قۇتتىقتاعان قورعانىس ءمينيسترى گەنەرال-پولكوۆنيك رۋسلان جاقسىلىقوۆ تانكيستەر جاۋىنگەرلىك دايىندىق دەڭگەيىن ۇدايى ارتتىرىپ قانا قويماي، كاسىبي شەبەرلىكتەرىن شىڭداپ، ءىس-قيمىلدىڭ جاڭا تاسىلدەرىن مەڭگەرەتىنىن اتاپ ءوتتى.
«تانكيستەر باتىلدىعىمەن، شىدامدىلىعىمەن، تاباندىلىعىمەن ەرەكشەلەنەدى. ولار تاكتيكا مەن شۇعىل ءىس-قيمىلدى، قارۋ-جاراق پەن اسكەري تەحنيكانى ۇرىستا قولدانۋ نەگىزدەرىن تەرەڭ مەڭگەرگەن. قورعانىس مينيسترلىگىنىڭ باسشىلىعىندا ءاردايىم تانك اسكەرلەرىندە قىزمەت ەتكەن گەنەرالداردىڭ دا بولۋى كەزدەيسوقتىق ەمەس»، – دەدى ۆەدومستۆو باسشىسى.
گەنەرال-پولكوۆنيك رۋسلان جاقسىلىقوۆ ءوزىنىڭ اسكەري بورىشىن ابىرويمەن اتقارىپ جۇرگەن اسكەري قىزمەتشىلەرگە، سونداي-اق قوعام ىسىنە جانە جاستاردى اسكەري-پاتريوتتىق تاربيەلەۋگە بەلسەنە ارالاسۋدى جالعاستىرىپ كەلە جاتقان قارۋلى كۇشتەردىڭ ارداگەرلەرىنە گراموتالار مەن العىس حاتتار تابىس ەتتى.
سالتاناتتى جينالىس بارىسىندا قورعانىس ءمينيسترى 2022 جىلعى تامىزدا وتكەن حالىقارالىق ارميا ويىندارىنىڭ سوڭعى قورىتىندىلارىن جاريالادى. بيىل ەلىمىزدىڭ قارۋلى كۇشتەرى 34 بايقاۋدىڭ جەتەۋىنە قاتىسىپ، ءتورت «التىن» جانە ءبىر «كۇمىس» جۇلدە ولجالادى. وسىلايشا، جالپى ەسەپتە 38 ەلدىڭ ىشىندە ءۇشىنشى ورىنعا يە بولدى.
«بارلىعى دا جەڭىستىڭ وڭاي كەلمەگەنىن كوردى. شىن مانىندە، بۇل جارىستار ءبىزدىڭ اسكەري ەكيپاجدار، ەسەپتوپتار ءۇشىن سىناق الاڭى بولدى. جاۋىنگەرلەر مورالدىق جانە پسيحولوگيالىق تۇرعىدا جەتىلىپ، جەڭىسكە دەگەن شەكسىز ەرىك-جىگەرىن، ءوز كاسىبىنە جانە اسكەري ماماندىققا ادالدىعىن وسى سايىستاردا انىق كورسەتتى»، – دەدى گەنەرال-پولكوۆنيك رۋسلان جاقسىلىقوۆ.
قورعانىس ءمينيسترى اسكەري سايىستاردا ۇزدىك ناتيجە كورسەتكەن اسكەري قىزمەتشىلەرگە ۆەدومستۆولىق «ەل قورعانى» مەدالدارىن تابىس ەتىپ، سونىمەن قاتار مەرزىمىنەن بۇرىن اسكەري اتاقتار بەردى.