كونستيتۋسيالىق كوميسسيانىڭ بەسىنشى وتىرىسىندا جۇيەلى ديالوگتىڭ ورنىقتى الاڭىنا اينالۋعا ءتيىس حالىق كەڭەسىن قۇرۋ جونىندەگى باستامالار تالقىلاندى. سولتۇستىك قازاقستان وبلىسى ءماسليحاتىنىڭ ءتوراعاسى ۆلاديمير بۋبەنكونىڭ ايتۋىنشا، جاڭا ورگاننىڭ قىزمەتى قوعام مەن بيلىك اراسىنداعى سەنىمدى نىعايتۋعا، اشىق تالقىلاۋ جانە شەشىمدەردى بىرلەسىپ ىزدەۋ مادەنيەتىن دامىتۋعا باعىتتالعان.
«حالىق كەڭەسى زاڭنامالىق باستاما قۇقىعىنا جانە رەسپۋبليكالىق رەفەرەندۋم وتكىزۋ تۋرالى ۇسىنىس جاساۋ مۇمكىندىگىنە يە بولادى. ونىڭ مارتەبەسى مەن وكىلەتتىگىن كونستيتۋسيالىق دەڭگەيدە بەكىتۋ ۇسىنىلادى. بۇل ونى بىردەن مەملەكەتتىك بيلىكتىڭ جۇيە قۇراۋشى ينستيتۋتىنا اينالدىرادى»، – دەپ اتاپ ءوتتى ۆلاديمير بۋبەنكو.
ول حالىق كەڭەسىن قۇرۋ كونستيتۋسيالىق رەفورمانىڭ رۋحى مەن لوگيكاسىنا سايكەس كەلەتىنىن اتاپ ءوتتى. بۇل نورمالار ءتىپتى قوعامدى مەملەكەتتىك باسقارۋ پروسەستەرىنە كەڭىنەن تارتۋدىڭ قۇقىقتىق نەگىزىنە اينالدى.
سونداي-اق، سپيكەردىڭ ايتۋىنشا، كونستيتۋسيالىق قۇندىلىق رەتىندە تابيعاتقا ۇقىپتى قاراۋ ماسەلەسى دە ەرەكشە ماڭىزعا يە.
«كونستيتۋسيا دەڭگەيىندە ەكولوگيالىق جاۋاپكەرشىلىك قاعيداتتارىن بەكىتۋ ورنىقتى دامۋعا دەگەن قوعامدىق سۇرانىستى كورسەتەدى جانە ءومىر ءسۇرۋ جاعدايىن ساقتاۋعا دەگەن ۇجىمدىق جاۋاپكەرشىلىك مادەنيەتىن قالىپتاستىرادى. ەكولوگيالىق قورعاۋ ءوز ءمانى بويىنشا قوعامدى جانە ونىڭ ۇزاقمەرزىمدى مۇددەلەرىن قورعاۋدىڭ نىسانى»، – دەپ اتاپ ءوتتى ءماسليحات ءتوراعاسى.
سونىمەن قاتار، ۆلاديمير بۋبەنكو حالىق كەڭەسىنىڭ قازاقستان حالقى اسسامبلەياسىنىڭ ەتنوسارالىق جانە كونفەسسياارالىق كەلىسىمدى قامتاماسىز ەتۋ، ىشكى ساياسات پەن مەملەكەتتىك يدەولوگيا بويىنشا ۇسىنىستار دايىنداۋ جونىندەگى فۋنكسيالارىن ءوز موينىنا الاتىنىنا دا توقتالدى.
«سايىپ كەلگەندە، حالىق كەڭەسى قوعامدىق سەنىم ينستيتۋتىنا اينالادى. ول ازاماتتار مەن مەملەكەت اراسىنداعى كەرى بايلانىستى قامتاماسىز ەتەدى، ءارتۇرلى الەۋمەتتىك جانە ەتنيكالىق توپتاردىڭ مۇددەلەرىن كەلىستىرىپ، قابىلداناتىن شەشىمدەردىڭ زاڭدىلىعىن ارتتىرادى. جالپىحالىقتىق رەفەرەندۋمدا جاڭا كونستيتۋسيا قابىلداعان جاعدايدا حالىق كەڭەسى قازاقستان ازاماتىنىڭ ءاربىر ءسوزى ەسكەرىلەتىن ەرەكشە پلاتفورماعا اينالادى»، – دەدى ۆلاديمير بۋبەنكو.