كونستيتۋسيالىق كوميسسيانىڭ كەزەكتى وتىرىسى باستالدى، - دەپ حابارلايدى aqshamnews.kz ءتىلشىسى.
كونستيتۋسيالىق كوميسسيا مۇشەلەرى قازاقستان رەسپۋبليكاسى اتا زاڭىنىڭ نەگىزگى بولىمدەرىنە تۇزەتۋلەردى دايىنداۋ بويىنشا اۋقىمدى جۇمىس اتقاردى. اتاپ ايتقاندا، ەل پارلامەنتىنىڭ وكىلەتتىكتەرى مەن راسىمدەرىنە ايتارلىقتاي ريەۆيزيا جۇرگىزىلدى. بۇل تۋرالى كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ كوميسسيانىڭ ءتورتىنشى وتىرىسىندا مالىمدەدى.
"پرەزيدەنت" ءبولىمىنىڭ ەرەجەلەرى تۇجىرىمدامالىق تۇرعىدان قايتا قارالدى: پرەزيدەنتتىك سايلاۋ مەن انت بەرۋ ءراسىمىنىڭ مەرزىمى، مەملەكەت باسشىسىنىڭ قۇرىلتايمەن، ۇكىمەتپەن جانە باسقا دا مەملەكەتتىك ورگاندارمەن ءوزارا ءىس-قيمىلى اياسىنداعى وكىلەتتىكتەرى، سونداي-اق كادر ماسەلەلەرى مەن نورما شىعارۋ فۋنكسيالارى.
"بولىمگە ۆيسە-پرەزيدەنتتىڭ قۇقىقتىق مارتەبەسى مەن وكىلەتتىكتەرىنە ارنالعان جاڭا باپ ەنگىزىلدى"، – دەپ اتاپ ءوتتى باقىت نۇرمۇحانوۆ.
"زاڭ شىعارۋشى ورگاننىڭ وكىلەتتىكتەرى مۇقيات قايتا قارالدى. قۇرىلتايدىڭ سەسسيالارى مەن قىزمەتىن ۇيىمداستىرۋعا قاتىستى بارلىق باپتار جاڭارتىلدى. زاڭ شىعارۋ باستاماسى قۇقىعى بار سۋبەكتىلەردىڭ ءتىزىمى كەڭەيتىلدى. قۇرىلتاي قابىلداعان زاڭدارمەن رەتتەلەتىن نەگىزگى قوعامدىق قاتىناستاردىڭ ءتىزىمى كەڭەيتىلدى. زاڭ جوبالارىن قاراۋ جانە قابىلداۋ راسىمدەرىن رەتتەيتىن ەرەجەلەر قايتا قارالدى"، – دەدى كونستيتۋسيالىق سوت ءتوراعاسىنىڭ ورىنباسارى.
باقىت نۇرمۇحانوۆ اتاپ وتكەندەي، رەسپۋبليكا ازاماتتارى اراسىنان قۇرىلعان قازاقستان حالىق كەڭەسىنە قاتىستى ەرەجەلەر جەكە بولىمدە شوعىرلانعان. سونداي-اق، جاڭا جوعارى كەڭەس ورگانى قازاقستان حالقىنىڭ مۇددەلەرىن ءبىلدىرۋ جانە زاڭ شىعارۋ باستاماسى قۇقىعىنا يە بولاتىنى بەكىتىلەدى.
سونىمەن قاتار، سالالىق كونستيتۋسيالىق زاڭدا كورسەتىلگەن كونستيتۋسيالىق سوتتىڭ قۇقىقتىق مارتەبەسى تۋرالى ەرەجەلەر دە كونستيتۋسيا جوباسىنا ەنگىزىلدى.
"كونستيتۋسيالىق قاداعالاۋدى جۇزەگە اسىراتىن جانە بۇكىل ەل بويىنشا كونستيتۋسيانىڭ ۇستەمدىگىن قامتاماسىز ەتەتىن تاۋەلسىز مەملەكەتتىك ورگان رەتىندەگى مارتەبەسىن بەكىتەدى"، – دەپ اتاپ ءوتتى باقىت نۇرمۇحانوۆ.