كونستيتۋسيالىق كوميسسيانىڭ كەزەكتى وتىرىسى باستالدى، - دەپ حابارلايدى aqshamnews.kz ءتىلشىسى.
كونستيتۋسيانىڭ ادامنىڭ جەكە باسىنا قول سۇقپاۋشىلىق، ادامنىڭ نەگىزگى قۇقىقتارىن قورعاۋ جانە سوت بيلىگىنىڭ تاۋەلسىزدىگىنە قاتىستى نورمالارى ايتارلىقتاي كۇشەيتىلەدى. بۇل ماسەلەلەر كونستيتۋسيالىق كوميسسيانىڭ ءتورتىنشى وتىرىسىندا قارالعان اتا زاڭعا ەنگىزىلەتىن وزگەرىستەردىڭ جيىنتىق جوباسىنان كورىنىس تاپتى.
جوبا تانىستىرىلىمىندا كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ ۇسىنىلعان وزگەرىستەردىڭ باستى تۇستارىنا ەرەكشە توقتالىپ، "نەگىزگى قۇقىقتار، بوستاندىقتار مەن مىندەتتەر" اتتى ءبولىمنىڭ جاڭا اتاۋى قاراستىرىلعان ماسەلەلەردى تولىق قامتيتىن اتاپ ءوتتى.
بۇل رەتتە ۇسىنىلعان نوۆەللالار ادامنىڭ ەڭ جوعارى قۇندىلىق ەكەنى تۋرالى قاعيداتقا سۇيەنە وتىرىپ، قۇقىقتار مەن بوستاندىقتاردى ىسكە اسىرۋ جانە قورعاۋ كەپىلدىكتەرىن كۇشەيتەدى جانە تولىقتىرادى.
"بۇل ءومىر ءسۇرۋ قۇقىعىن ابسوليۋتتىك دارەجەگە كوتەرۋ، ادامعا باعدارلانعان ساياسات، ادامنىڭ جەكە باسىنا قول سۇعىلماۋشىلىق پەن "ميراندا ەرەجەسىنىڭ"، سيفرلىق داۋىردە جەكە مالىمەتتەردى قورعاۋ، ار-نامىس پەن قادىر-قاسيەتتى قورعاۋدى كۇشەيتۋ، الەۋمەتتىك قۇقىقتار مەن قۇقىقتىق انىقتىق قاعيداتتارىن بەكىتۋ دەگەن ءسوز"، — دەدى باقىت نۇرمۇحانوۆ.
ول قازىرگى ۋاقىتتا كونستيتۋسيانىڭ 7-بولىمىندەگى سوت ادىلدىگى قاعيداتى رەتىندە قاراستىرىلىپ وتىرعان كەيبىر نورمالاردىڭ ادام قۇقىقتارىن قورعاۋ كەپىلدىگى رەتىندە وسى بولىمگە كوشىرىلىپ، جەكە باپقا بىرىكتىرىلەتىنىن ايتتى.
"ءسوز بوستاندىعى مەن شىعارماشىلىق ەركىندىك قۇقىعىنا جاڭا ءمان-ماعىنا بەرىلىپ، دەموكراتيالىق جانە قۇقىقتىق مەملەكەتتە جەكە تۇلعانىڭ ەركىن دامۋىنىڭ ماڭىزدى شارتى سانالاتىن زياتكەرلىك مەنشىكتى قورعاۋ كەپىلدىكتەرىنىڭ بولەك تۇرلەرى بەلگىلەندى"، – دەپ اتاپ ءوتتى كونستيتۋسيالىق سوت ءتوراعاسىنىڭ ورىنباسارى.
"اتى وزگەرگەن "سوت جۇيەسى. پروكۋراتۋرا. قۇقىق قورعاۋ تەتىكتەرى" بولىمىندە ايتارلىقتاي وزگەرىستەر كوزدەلگەن. وعان سوت ءىسىن جۇرگىزۋ نىساندارىن كەڭەيتۋگە، ادىلەتتىلىك پەن سوت تاۋەلسىزدىگىنىڭ كونستيتۋسيالىق قاعيداتتارىن نىعايتۋعا، سونداي-اق سوت جۇيەسىندەگى كادر ماسەلەلەرىنە قاتىستى سوت ماسەلەلەرى بويىنشا ماڭىزدى تۇزەتۋلەر كىرەدى"، – دەدى باقىت نۇرمۇحانوۆ.
سونداي-اق، ول كونستيتۋسيالىق كوميسسيا مۇشەلەرىنىڭ نازارىن ادۆوكاتۋرانىڭ قۇقىقتىق مارتەبەسىن بەكىتەتىن جەكە باپتىڭ قاراستىرىلعانىنا اۋداردى.
سونىمەن قاتار، كونستيتۋسيالىق كوميسسيانىڭ مۇشەسى قۇرىلتايدىڭ قۇرىلۋىنا بايلانىستى "جەرگىلىكتى مەملەكەتتىك باسقارۋ جانە ءوزىن-وزى باسقارۋ" بولىمىنە ناقتى تۇزەتۋلەر ەنگىزۋ قاجەت بولعانىنا دا توقتالدى.
ءسوز سوڭىندا باقىت نۇرمۇحانوۆ "كونستيتۋسياعا وزگەرىستەر مەن تولىقتىرۋلار ەنگىزۋ" دەپ اتالاتىن جاڭا ءبولىم اتا زاڭنىڭ ءماتىنىن ەڭ ۇزدىك حالىقارالىق تاجىريبەگە سايكەس جاڭارتۋعا مۇمكىندىك بەرەتىنىن اتاپ ءوتتى.