الماتى مەملەكەتتىك بيزنەس كوللەدجىنىڭ بازاسىندا «ادال ازامات» ءبىرتۇتاس تاربيە باعدارلاماسى اياسىندا قوعام ءۇشىن ايرىقشا ماڭىزعا يە «زاڭ مەن ءتارتىپ» قۇندىلىعىن جۇزەگە اسىرۋ ماقساتىندا «ءادىل زاڭ – ەل تىرەگى» اتتى تاعىلىمدى كەزدەسۋ وتكىزىلدى.
مەملەكەت باسشىسى قاسىم-جومارت توقايەۆ ءوز جولداۋلارىندا: «زاڭ مەن ءتارتىپ — ادىلەتتى قوعامنىڭ نەگىزى. ءار ازامات زاڭ تالاپتارىن بۇلجىتپاي ورىنداۋعا ءتيىس. بۇل — تۇراقتى دامۋدىڭ باستى شارتى»، — دەپ اتاپ كورسەتكەن بولاتىن. وسى ۇستانىم بۇگىنگى كەزدەسۋدىڭ نەگىزگى يدەيالىق وزەگىنە اينالدى.
ءىس-شارا ستۋدەنت جاستاردىڭ قۇقىقتىق ساۋاتتىلىعىن ارتتىرۋعا، زاڭعا قۇرمەت پەن ازاماتتىق جاۋاپكەرشىلىكتى قالىپتاستىرۋعا، سونداي-اق قۇقىقبۇزۋشىلىقتىڭ الدىن الۋعا باعىتتالدى. كەزدەسۋ اشىق ديالوگ فورماتىندا ءوتىپ، ناقتى ومىرلىك مىسالدار مەن كاسىبي تاجىريبەگە نەگىزدەلدى.
كەزدەسۋ بارىسىندا كوللەدجدىڭ ديرەكتوردىڭ تاربيە ءىسى جونىندەگى ورىنباسارىنىڭ م.ا. شولپان مارات قىزى دا ءسوز سويلەپ، ءىس-شارانىڭ تاربيەلىك ماڭىزىنا توقتالدى. ول ءوز پىكىرىندە:
«بۇگىنگى كەزدەسۋدىڭ باستى ماقساتى — ستۋدەنتتەرگە زاڭدى تەك تالاپ رەتىندە ەمەس، ومىرلىك قۇندىلىق رەتىندە ءتۇسىندىرۋ. “ادال ازامات” ءبىرتۇتاس تاربيە باعدارلاماسى اياسىندا ءبىز جاستاردىڭ بويىنا زاڭعا قۇرمەت، تارتىپكە جاۋاپكەرشىلىك جانە ازاماتتىق سانا قالىپتاستىرۋدى كوزدەيمىز. ويتكەنى ءادىل زاڭدى سىيلايتىن، ءتارتىپتى ساقتايتىن جاس — ەل بولاشاعىنىڭ بەرىك نەگىزى»، — دەپ اتاپ ءوتتى.
سونداي-اق ول كوللەدجدە تاربيە جۇمىسى جۇيەلى جانە كەشەندى تۇردە جۇرگىزىلىپ جاتقانىن ايتىپ، قۇقىق قورعاۋ ورگاندارىمەن بىرلەسكەن وسىنداي كەزدەسۋلەردىڭ ستۋدەنتتەردىڭ ومىرلىك ۇستانىمىنا وڭ اسەر ەتەتىنىن ەرەكشە اتاپ ءوتتى.
كەزدەسۋگە قۇقىق قورعاۋ سالاسىنىڭ بىلىكتى وكىلدەرى، سونىڭ ىشىندە الماتى قالاسى پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسى باسشىسىنىڭ ورىنباسارى، «Amanat» پارتياسى جانىنداعى «جاستار رۋحى» الماتى قالالىق فيليالىنىڭ ءتوراعاسى، ۇيىمداسقان قىلمىسقا قارسى كۇرەس باسقارماسىنىڭ اعا جەدەل ۋاكىلى ت.ب قۇرمەتتى قوناقتار ارنايى شاقىرىلدى.
ءىس-شارا بارىسىندا سپيكەرلەر قۇقىق قورعاۋ ورگاندارىنىڭ قىزمەتى، كامەلەتكە تولماعاندار اراسىنداعى قۇقىقبۇزۋشىلىق تۇرلەرى، ولاردىڭ الدىن الۋ شارالارى، سونداي-اق اكىمشىلىك جانە قىلمىستىق جاۋاپكەرشىلىك ماسەلەلەرى بويىنشا مازمۇندى باياندامالار جاساپ ارنايى ۆيدەوروليكتەر كورسەتتى.
الماتى قالاسى پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ ورىنباسارى پوليسيا پولكوۆنيگى ءمادي قۇرمانجانوۆ ءوز سوزىندە:
«زاڭ مەن ءتارتىپ — تەك قۇقىق قورعاۋ ورگاندارىنىڭ مىندەتى ەمەس، بۇل — ءار ازاماتتىڭ ىشكى مادەنيەتى مەن جاۋاپكەرشىلىگى. جاستاردىڭ زاڭدى ەرتە جاستان ءتۇسىنىپ، ونى سانالى تۇردە ساقتاۋى — قوعام قاۋىپسىزدىگىنىڭ باستى كەپىلى»، — دەپ اتاپ ءوتتى.
ال ۇيىمداسقان قىلمىسقا قارسى كۇرەس باسقارماسىنىڭ وكىلى ەرلان ساتايەۆ ۇيىمداسقان قىلمىستىڭ جاستار ءۇشىن اسا ءقاۋىپتى ەكەنىن اتاپ ءوتىپ:
«قىلمىستىق توپتار كوبىنە جاس، تاجىريبەسىز ادامداردى وزدەرىنە تارتۋعا تىرىسادى. سوندىقتان ءاربىر ستۋدەنت زاڭسىز ارەكەتتىڭ سالدارى قانداي بولاتىنىن انىق ءبىلۋى ءتيىس»، — دەپ ەسكەرتتى.
كەزدەسۋدىڭ قورىتىندى بولىمىندە پوليسيا كاپيتانى مارجان بەيبيت كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الۋ جايىندا كەڭىنەن توقتالىپ:
«زاڭدى ءبىلۋ — مىندەت، ال ونى ساقتاۋ — ازاماتتىق پارىز. ءاربىر ستۋدەنت ءوز ارەكەتىنىڭ سالدارىن تۇسىنسە، كوپتەگەن كەلەڭسىز جاعدايدىڭ الدىن الۋعا بولادى»، — دەپ تۇيىندەدى.
اتالعان كەزدەسۋ ستۋدەنتتەر ءۇشىن ۇلكەن تاعىلىمعا اينالىپ، ولاردىڭ قۇقىقتىق تانىمىن كەڭەيتۋگە، زاڭعا دەگەن كوزقاراسىن نىعايتۋعا زور ىقپال ەتتى. «ءادىل زاڭ – ەل تىرەگى» اتتى بۇل باستاما كوللەدجدەگى تاربيە جۇمىسىنىڭ جۇيەلى تۇردە جۇرگىزىلىپ جاتقانىن جانە ادال، جاۋاپكەرشىلىگى جوعارى ازامات تاربيەلەۋگە باعىتتالعان ناقتى قادامداردىڭ ءبىرى ەكەنىن كورسەتتى.