بولات ايۋحانوۆ 85 جاسىنا قاراعان شاعىندا ومىردەن ءوتتى.
بالەت ءارتىسى ءارى حورەوگراف، قازاق كسر حالىق ءارتىسى، الماتى قالاسىنىڭ قۇرمەتتى ازاماتى بولات ايۋحانوۆ قايتىس بولدى، دەپ حابارلايدى Almaty-akshamy.kz Baq.kz سىلتەمە جاساپ.
مەملەكەتتىك اكادەميالىق بي تەاترى مالىمەتىنشە، بولات ايۋحانوۆ 85 جاسىنا قاراعان شاعىندا قايتىس بولدى. قوشتاسۋ ءراسىمى اباي اتىنداعى قازاق ۇلتتىق وپەرا جانە بالەت تەاترىندا وتەدى.
بولات عازيز ۇلى ايۋحانوۆ 1938 جىلى 13 قىركۇيەكتە سەمەي قالاسىندا تۋعان. ول ا.ۆ. لۋناچارسكيي اتىنداعى ماسكەۋ تەاتر ونەرى ينستيتۋتىنىڭ بالەتمەيستەرلىك فاكۋلتەتىن بىتىرگەن. 100-دەن اسا رەسەنزيا، ماقالا، سۇحباتتىڭ اۆتورى. قازاق، ورىس، تۇرىك، ليتۆا، اعىلشىن جانە ۋكراين تىلدەرىن بىلگەن.
1957 جىلدان اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا بالەت ءارتىسى بولىپ جۇمىس ىستەگەن. 1964 جىلدان باستاپ اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا بالەتمەيستەر بولعان. 1965 جىلدان "قازاقكونسەرت" ەكى اكتەرلى تەاترىنىڭ بالەت ءسوليسى. 1967 جىلدان باستاپ "قازاقكونسەرت" جانىنداعى الماتى جاستار بالەتى تەاترىنىڭ كوركەمدىك جەتەكشىسى، بالەت ءسوليسى. 1975 جىلدان باستاپ قازاقستان كلاسسيكالىق بي ءانسامبلىنىڭ كوركەمدىك جەتەكشىسى، بالەت ءسوليسى. 1976 جىلدان - قازاقستان كلاسسيكالىق بي ءانسامبلىنىڭ كوركەمدىك جەتەكشىسى، ديرەكتورى بولعان. ال 1991 جىلدان باستاپ قازاق مەملەكەتتىك كلاسسيكالىق بي ءانسامبلىنىڭ كوركەمدىك جەتەكشىسى بولدى. 2003 جىلدان بەرى ق ر مەملەكەتتىك اكادەميالىق بي تەاترىنىڭ ديرەكتورى قىزمەتىن اتقاردى.
"بولەرو"، "قازاق سۋۆەنيرى"، "باتىرلار"، "قىز جىبەك"، "گاملەت"، "كارمەن-سيۋيتا"، "شىڭعىسحان" جانە باسقا قويىلىمدارعا قاتىسقان. "ءبىزدىڭ جەرىمىزدىڭ بايلىعى"، "جاۋىم، توعىزىنشى ۇلدان ساقتان"، "تۇنەكتىڭ ءامىرشىسى"، "ايداي سۇلۋ ايسۇلۋ ەرتەگىسى تۋرالى" كينوفيلمدەرىنە تۇسكەن.