حالقىنىڭ سانى شارىقتاۋ شەگىنە جەتكەن مەملەكەتتەر اتالدى

بىرىككەن ۇلتتار ۇيىمى ءار مەملەكەتتىڭ حالىق سانىنىڭ شارىقتاۋ شەگى قاي كەزەڭدەرگە تۇسپا-تۇس كەلەتىنى  تۋرالى بولجام جاسادى.

بۇل جايىندا islam.kz پورتالى بۇۇ سايتىنا سىلتەمە جاساي وتىرىپ ءمالىم ەتكەن، دەپ حابارلايدى aqshamnews.kz.

 «الەم تۇرعىندارىنىڭ كەلەشەگى» اتتى بايانداماداعى مالىمەتتەرگە قاراعاندا، ادامزاتتىڭ تورتتەن بىرىنەن كوبى حالىق سانى ازايىپ كەلە جاتقان ەلدەردە تۇرادى. ماسەلەن، وتكەن جىلى جۇڭگو، گەرمانيا، جاپونيا جانە رەسەي حالقىنىڭ سانى ءوزىنىڭ شارىقتاۋ شەگىنە جەتكەن.

دەموگرافيالىق بولجام بويىنشا بيىل 48 ەلدە حالىق سانى شارىقتاۋ شەگىنە جەتپەك. بۇل ەلدەردەگى حالىق سانى ادامزاتتىڭ 10 %-ن قۇرايتىن بولادى. 2054 جىلعا دەيىن ءۇندىستاندا، پاكىستاندا، نيگەريادا جانە امەريكا قۇراما شتاتتارىندا، سونداي-اق، 126 ەلدە حالىق سانى وسەتىن بولادى. اقش، كانادا، فرانسيا جانە ۇلىبريتانيا سياقتى ەلدەردە حالىق سانى كوشى-قون (ميگرانتتار) ەسەبىنەن وسەدى، ال تۋۋدىڭ جوعارى كورسەتكىشى مەن نەعۇرلىم جاس دەموگرافيالىق قۇرىلىم انگولادا، سومالي مەن نيگەردە حالىق سانىنىڭ وسۋىنە ىقپال ەتەتىن نەگىزگى فاكتورعا اينالادى. ال پاكىستان مەن نيگەريادا حالىق سانى 2100 جىلدان كەيىن دە باياۋ وسپەك. وسى ورايدا مۇنداي بولجام قازىرگى تۋۋ كوەففيسيەنتى، ءولىم-جىتىم دەڭگەيى جانە كوشى-قون سەكىلدى كورسەتكىشتەرگە نەگىزدەلگەن. سوعىس، جۇقپالى ىندەت، اشتىق، كليمات داعدارىسى، الەۋمەتتىك-ەكونوميكالىق احۋالدار، ت.ب. سەكىلدى تۋۋ كورسەتكىشىنە ءسوزسىز اسەر ەتەتىن وزگە فاكتورلار بۇل بولجامدا ەسكەرىلگەن جوق.