ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ اۋىلدارعا سۋ بەرۋ جۇمىستارىنىڭ جوسپارىن باياندادى، دەپ حابارلايدى almaty-akshamy.kz قازاقپاراتقا سىلتەمە جاساپ.
«ەلىمىزدە بارلىعى 6 316 اۋىل بار. ونىڭ ىشىندە 3 991 اۋىل ورتالىقتاندىرىلعان سۋمەن جابدىقتالعان، 403 اۋىلدا كەشەندى بلوك-مودۋلدەر ورناتىلعان. سۋمەن جابدىقتالماعان 1 922 اۋىلدىڭ ماسەلەسىن شەشۋ ءۇشىن مىناداي شارالار قابىلداپ جاتىرمىز. 793 اۋىلدا ورتالىقتاندىرىلعان سۋمەن جابدىقتاۋ جۇيەلەرىن سالۋ جوسپارلانعان. 200-دەن از ادام تۇراتىن شاعىن اۋىلداردا كەشەندى بلوك-مودۋلدەر ورناتىلادى»، - دەدى بەيبىت اتامقۇلوۆ ۇكىمەتتىڭ بۇگىنگى وتىرىسىندا.
ونىڭ ايتۋىنشا، بيىل تاعى 148 اۋىلدى ورتالىقتاندىرىلعان سۋمەن جابدىقتاۋ جانە حالقى از 220 اۋىلعا كەشەندى بلوك-مودۋل ورناتۋ جوسپارلانعان.
«بۇگىنگى تاڭدا ورتالىق سۋمەن جابدىقتاۋ جوسپارلانعان 85 اۋىلدا (بقو، اتىراۋ، تۇركىستان، الماتى، جامبىل، قاراعاندى، شقو، اقمولا، اقتوبە) گيدروگەولوگيالىق جۇمىستار جۇرگىزۋ قاجەت. كەشەندى بلوك-مودۋل ورناتۋ جوسپارلانعان حالقى از 170 اۋىلدا ىزدەستىرۋ-بارلاۋ جۇمىستارىن جۇرگىزۋ قاجەت. مەملەكەت باسشىسىنىڭ تاپسىرماسىن ۋاقىتىلى ورىنداۋ ماقساتىندا قالعان 453 اۋىل بويىنشا 2023 جىلعا دەيىن جوبالاۋ-سمەتا قۇجاتتاماسىن ازىرلەۋدى اياقتاۋ قاجەت»، - دەدى مينيستر.