بۇگىن «حابار» تەلەارناسىنان «قاسىرەتتى قاڭتار. تارتىپسىزدىكتەر» جاڭا دەرەكتى ءفيلمى كورەرمەنگە جول تارتادى. جوبا قازاقستانداعى قاڭتار وقيعاسى تۋرالى فيلمدەر سيكلىنىڭ ءۇشىنشى ءبولىمى بولىپ تابىلادى، دەپ حابارلايدى اlmaty-akshamy.kz
ەستەرىڭىزگە سالا كەتەيىك، بۇعان دەيىن «حابار» اگەنتتىگى «قاسىرەتتى قاڭتار. وقيعا قالاي ءوربىدى؟» جانە «قاسىرەتتى قاڭتار. مارودەرلار» فيلمدەرىن كورسەتتى. ءبىرىنشى ءبولىم قاڭتار وقيعالارىنىڭ تولىق حرونولوگياسىنا نەگىزدەلسە، ەكىنشىسى مارودەرلار تۋرالى جاڭا فاكتىلەردى كورەرمەن نازارىنا ۇسىندى.
قاسىرەتتى قاڭتار تۋرالى دەرەكتى فيلمدەر توپتاماسىنىڭ كەزەكتى ءبولىمى وقيعا كۋاگەرلەرىنىڭ ەكسكليۋزيۆتى سۇحباتتارىنا نەگىزدەلگەن.
- ءبىز جاپپاي تارتىپسىزدىك، سونداي-اق قارۋ-جاراقتى ۇرلاۋ باپتارى بويىنشا كۇدىكتى بولعان جانە سوتتالعان ازاماتتاردان سۇحبات الدىق. ولار وقيعالارعا كوزقاراستارىن ءبىلدىرىپ، تارتىپسىزدىكتىڭ وزىندىك حرونولوگياسىمەن ءبولىستى. ءتۇسىرىلىم بارىسىندا پوليسەيلەرگە شابۋىل جاساعان، اكىمدىكتى قيراتقان، ارماتۋرانى اكەلگەن ادامداردىڭ پىكىرلەرىن تىڭدادىق، - دەدى جوبا اۆتورى ايگۇل ءادىلوۆا.
«قاسىرەتتى قاڭتار. تارتىپسىزدىكتەر» دەرەكتى ءفيلمىنىڭ كورسەتىلىمىن بۇگىن، 3 ناۋرىز كۇنى، ساعات 20:30-دا «حابار» تەلەارناسىنان جىبەرىپ الماڭىزدار.