بۇل كەڭەستىڭ جۇمىسى ارنايى زاڭمەن ايقىندالعان.
عىلىم جانە جوعارى ءبىلىم مينيسترلىگى جانىنان قوعامدىق كەڭەس قۇرىلدى. ونىڭ قۇرامىنا پارلامەنت دەپۋتاتتارى، مەملەكەت جانە قوعام قايراتكەرلەرى، عالىمدار، وقىتۋشىلار، ازاماتتىق قوعام جانە ب ا ق وكىلدەرى كىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
عىلىم، جوعارى ءبىلىم جانە ءتىل ساياساتى ماسەلەلەرى جونىندەگى قوعامدىق كەڭەستىڭ العاشقى وتىرىسىنا مينيستر ساياسات نۇربەك قاتىسىپ، ۆەدومستۆونىڭ الداعى جوسپارلارىنا توقتالدى.
«جاڭادان قۇرىلعان مينيسترلىكتىڭ الدىنا مەملەكەت باسشىسى ۇلكەن مىندەتتەر قويىپ وتىر. عىلىم مەن جوعارى ءبىلىم سالاسىنا قاتىستى بارلىق شەشىمدەردى وزدەرىڭىزدىڭ تالقىلاۋلارىڭىزعا ۇسىنامىز. سەبەبى قوعامدىق كەڭەستىڭ جۇمىسى ارنايى زاڭمەن ايقىندالعان. قۇزىرەتى دە جوعارى. جۇرتشىلىقتىڭ، ازاماتتىق قوعامنىڭ پىكىرىن ەسكەرىپ، بىزگە قولداۋ كورسەتەدى دەپ سەنەمىز»، – دەدى مينيستر.
وتىرىسقا قوعامدىق كەڭەستىڭ 17 مۇشەسىنىڭ 11ء-ى وفلاين، 6-ۋى ونلاين قاتىستى. داۋىس بەرۋ ارقىلى عىلىم جانە جوعارى ءبىلىم سالاسىندا، سونداي-اق قوعامدىق كەڭەس جۇمىسىن جۇرگىزۋدە تاجىربيەسى مول قوعام قايراتكەرى سەرىك ىرسالييەۆ قوعامدىق كەڭەس ءتوراعاسى بولىپ سايلاندى.
مينيسترلىكتىڭ سالالىق باعىتى ەسكەرىلىپ، 5 كوميسسيا قۇرىلدى. ولاردىڭ ءتوراعالارى سايلاندى.
- نورماتيۆتىك-قۇقىقتىق اكتىلەردىڭ جوبالارىن قاراۋ جانە سىبايلاس جەمقورلىققا قارسى ءىس-قيمىل ماسەلەلەرى بويىنشا كوميسسيا ءتوراعاسى بولىپ «د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى» كوممەرسيالىق ەمەس اكسيونەرلىك قوعامىنىڭ عىلىمي كەڭەسشىسى جاسۇلان شايماردانوۆ؛
- بيۋدجەت ماسەلەلەرى بويىنشا كوميسسيا ءتوراعاسى بولىپ ق ر پارلامەنتى ءماجىلىسىنىڭ دەپۋتاتى يرينا سميرنوۆا؛
- عىلىم ماسەلەلەرى بويىنشا كوميسسيا ءتوراعاسى بولىپ «QazBioPharm» ۇلتتىق حولدينگى» اكسيونەرلىك قوعامىنىڭ باسقارما ءتوراعاسى كۇنسۇلۋ زاكاريا؛
- جوعارى ءبىلىم ماسەلەلەرى بويىنشا كوميسسيا ءتوراعاسى بولىپ ازاماتتىق قوعام وكىلى امانتاي نۇرماعامبەتوۆ؛
- ءتىل ساياساتى ماسەلەلەرى بويىنشا كوميسسيا ءتوراعاسى بولىپ ق ر پارلامەنتى ءماجىلىسىنىڭ دەپۋتاتى ماقپال تاجماعامبەتوۆا سايلاندى.
جيىن سوڭىندا 3 جىلعا سايلانعان قوعامدىق كەڭەستىڭ ءتورالقاسى بەكىتىلدى.