ەنەرگەتيكا مينيسترلىگى اتوم ەنەرگەتيكاسى جانە ونەركاسىبى دەپارتامەنتىنىڭ ديرەكتورى عۇمار سەرعازيننىڭ ايتۋىنشا، قازاقستاندا اەس سالۋ ۋاقىتى الدەقاشان جەتكەن.
"بىزگە نەگىزى اەس-تى باياعىدا-اق سالۋ كەرەك ەدى. ەندى سالماۋ كۇنا"، – دەپ ول ماگاتە ۇيىمىنىڭ ماماندارىنىڭ پىكىرىنە سۇيەنە وتىرىپ مالىمدەدى.
سەرعازيننىڭ ايتۋىنشا، اەس سالۋعا بارلىق العىشارتتار بار: شيكىزات قورى جەتكىلىكتى، ءوندىرىس جوعارى دەڭگەيدە دامىعان، عىلىمي الەۋەتىمىز كوپتەگەن دامىعان ەلدەردەن الدا. ەگەر اەس سالۋ تۋرالى شەشىم قابىلدانسا، قازاقستاننىڭ ەنەرگەتيكالىق جەتىستىگى ودان ءارى دامي تۇسەتىنىنە سەنىمدى. ۇمىتكەر ءتورت كومپانيانىڭ بىرەۋىمەن كەلىسىمگە قول قويىلسا، الداعى ون جىلدا قازاقستاندىق ماماندار شەتەلدىك اتوم ەلەكتر ستانسيالارىندا تاجىريبە جيناقتايتىن بولادى.
"مەن ءوزىم وڭتۇستىك كورەيا، اقش، بەلورۋس سىندى ەلدەردىڭ اتوم ستانسيالارىندا بولدىم. ەكسكۋرسيا كەزىندە ولاردىڭ تاريحىمەن تانىسىپ، اەس ورنالاسقان جەردەگى اۋىلداردىڭ كەيىن ۇلكەن قالالارعا اينالعانىن كوردىم. سول سياقتى ەرتەڭ ۇلكەن اۋىلى دا ۇلكەن قالاعا اينالارىنا كۇمانىم جوق"، – دەدى عۇمار سەرعازين.