دروندار 10 شاقىرىم راديۋستا 30-40 كەلىگە دەيىن جۇك كوتەرىپ، كۇنىنە 100-گە دەيىن رەيس جاساي الادى
بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين مالىمدەدى، دەپ حابارلايدى Almaty-akshamy.kz.
امەريكادان اكەلىنگەن درون قۇرىلعىلارىنىڭ ماركاسى - ARC Drones.
«ءقازىر ARC Drones وكىلدەرى اتىراۋ قالاسىندا ءجۇر، ولار تجم قىزمەتكەرلەرىمەن بىرلەسىپ ەڭ شالعاي جانە جەتكىزۋ قيىندىق تۋعىزاتىن جەرلەرگە ازىق-تۇلىك، دارى-دارمەك پەن باسقا دا ومىرلىك ماڭىزدى زاتتاردى شۇعىل تاسىمالداۋ جۇمىستارىنا كىرىسۋگە دايىن»، دەپ جازدى باعدات مۋسين.
ARC Drones – وتانداستارىمىز الىبەك ەرساي مەن اسەل تۇرسىن نەگىزىن قالاعان امەريكالىق ستارتاپ. بۇل دروندار 10 شاقىرىم راديۋستا 30-40 كەلىگە دەيىن جۇك كوتەرىپ، كۇنىنە 100-گە دەيىن رەيس جاساي الادى.
مينيستر اتالعان دروندار سۋ سىنامالارىن دا جيناۋعا قاۋقارلى ەكەنىن ايتتى.
سونداي-اق ARC Drones درون قۇرىلعىسى قۇتقارۋشىلار مەن ەرىكتىلەردىڭ قاۋىپسىزدىگىن قامتاماسىز ەتىپ، جۇمىسىن جەڭىلدەتەدى.