دانا قاراعۇسوۆا قازاقستاننان عارىشقا تۋريست رەتىندە ۇشاتىن العاشقى ايەل اتانادى، دەپ حابارلايدى aqshamnews.kz kursiv.media-عا سىلتەمە جاساپ.
كاسىپكەر New Shepard كەمەسىنىڭ ەكيپاجى قۇرامىنا كىردى. امەريكالىق Blue Origin كومپانياسى وسىمەن 36-مارتە تۋريستەردى وربيتاعا الىپ شىعادى. ميسسيا تۋرالى كومپانيانىڭ باسپا ءسوز قىزمەتى حابارلايدى.
قاراعۇسوۆامەن بىرگە عارىشعا كاسىپكەر دجەفف ەلگين، ينجەنەر كلينت كەللي III، ستارتاپتار نەگىسىز قالاۋشى اارون نيۋمان، ۋكراين كاسىپكەرى ۆيتاليي وستروۆسكيي جانە تاعى ءبىر جولاۋشى كوتەرىلەدى. ول ءاتى-جونىن قۇپيا ۇستاۋدى ءجون كوردى.
«ادامزات بولاشاعى عارىشپەن بايلانىستى»
دانا Instagram-داعى پاراعى عارىشقا ساپارى جايلى بىلاي دەپ جازدى:
«ادامزاتتىڭ بولاشاعى عارىشپەن بايلانىستى. جاڭا كوكجيەكتەردى باعىندىرۋ ارقىلى ءبىز تەحنولوگيالاردى عانا دامىتىپ قويماي، جەكە مۇمكىندىگىڭىزدى كەڭەيتە تۇسەمىز. مەن ءۇشىن Blue Originء-نىڭ NS-36 ميسسياسى – زەرتتەۋ جوباسىنىڭ ءبىر بولىگى، سونىمەن بىرگە ۇزاق جىلدار بويى تالپىنىپ كەلە جاتقان ارمانىما جاقىنداي ءتۇسۋ»، – دەپ جازدى بولاشاق عارىش ءتۋريسى.
ەكيپاج قۇرامى تۋرالى مالىمەت بويىنشا، دانا قاراعۇسوۆا 25 جىلدان استام ۋاقىت بويى مەديا، ديستريبۋسيا جانە ءتۇرلى شارالاردى ۇيىمداستىرۋمەن اينالىسقان. ول Portals، مۋلتيمودالدى ەكوجۇيەسىنىڭ نەگىزىن قالاعان. جۇيە ونەر مەن عىلىمدى سيفرلى تەتىكتەر ارقىلى بىرىكتىرەدى.
كاسىپكەرلىكتەن بولەك، قاراعۇسوۆا الپينيست رەتىندە دە تانىمال. ول كيليماندجارو مەن ەلبرۋستى باعىندىرعان. دانا شىڭعا شىعۋدى ىشكى كۇشىن سىناۋدىڭ ءبىر امالى دەپ قاراستىرادى. ەندى قازاق قىزى عارىشقا ۇمتىلادى. كاسىپكەر ونى «ەرمەك ەمەس، ادامزاتتىڭ جاڭا ەۆوليۋسياسى باستالاتىن شەكارا» دەپ بىلەدى.
NS-36 ميسسياسى – New Shepard باعدارلاماسىنىڭ 15-ساپارى. وسى جوبا اياسىندا Blue Origin عارىشقا 75 ادامدى الىپ شىقتى. بەس جولاۋشى ەكى مارتە كوككە كوتەرىلگەن.
كەمە ۇشاتىن كۇن كەيىن جاريالانادى. ساپار BlueOrigin.com سايتىندا، سونىمەن بىرگە الەۋمەتتىك جەلىلەر مەن YouTube پلاتفورماسىندا كورسەتىلەدى.
بۇعان دەيىن Kursiv.Media قازاقستان تاريحىندا العاشقى عارىشكەر قىزدار توبى قۇرىلعانىن جازعان. ارۋلار عارىشقا ۇشپاسا دا، جەردەگى مودۋلدە جاتتىعادى. SANA-1 دەپ اتالاتىن سىناق 10 تاۋلىككە سوزىلادى.
Wikipedia.org سايتىندا دانا قاراعۇسوۆا ەكس-دەپۋتات گۇلجان قاراعۇسوۆانىڭ قىزى ەكەنى جازىلعان.