بي ارقىلى ۇلتتىق ونەردى ناسيحاتتاۋ.
ۇلتتىق ءداستۇردى، سالتتى تانىتاتىن ونەردىڭ تورەسى – بي. وسىنداي ۇستانىمى بار «گۇلدەر» بي توبى مۇحيتتىڭ ار جاعىندا قازاق حالقىنىڭ مادەنيەتىن ناسيحاتتاپ ءجۇر، دەپ حابارلايدى Almaty-akshamy.kz «حابار 24».
ۆيردجينيا شتاتىندا بەلسەندى قىزداردىڭ ۇيىتقى بولۋىمەن قۇرىلعان ۇجىم ءتۇرلى سالتاناتتى شارالاردا ساحانانىڭ ءسانىن كەلتىرەدى.
«مەن سولتۇستىك كورالينودا تۇرامىن. وسى جاققا كەلۋگە بەس ساعات ۋاقىت كەتەدى. مەن كىشكەنتاي كەزىمدە تاراز قالاسىنداعى ايشا ءبيبى توبىندا بيلەگەنمىن. وزىمە وتە ۇنايدى، سوندىقتان شارشامايمىن»، - دەيدى «گۇلدەر» توبىنىڭ مۇشەسى گۇليار حاسانوۆا.
«گۇلدەر» توبى 2017 جىلى قۇرىلدى. ۆاشينگتوندا وتكەن حالىقارالىق شارادا قازاقتىڭ مادەنيەتىن تانىستىرۋ ءۇشىن جينالعان قىزدار سول كەزدە كورەرمەندەر تاراپىنان ۇلكەن قولداۋ تاپقان. اقىلداسا كەلە، توپ قۇرادى.
«ءبىز ۆاشينگتوندا ۇيىمداستىرىلاتىن حالىقارالىق فەستيۆالدەردە قازاقتىڭ مادەنيەتىن تانىستىرۋدى جالعاستىرۋىمىز كەرەك دەپ شەشتىك»، - دەيدى «گۇلدەر» توبىنىڭ مۇشەسى اينۇر نۋركينا.
امەريكاداعى مادەني شارالار، ناۋرىز مەرەكەسى ءقازىر «گۇلدەر» توبىنىڭ قاتىسۋىنسىز وتپەيدى. ولار دا ونەرىنىڭ ارقاسىندا بىرنەشە شتاتتى ارالاپ شىققان. ءقازىر توپتىڭ رەپەرتۋارىندا ازيا حالىقتارىنىڭ كوپتەگەن ءبيى بار. ەلگە دەگەن ساعىنىش پەن ماحاببات شىعار، «گۇلدەر» توبى ساحانادا ونەر كورسەتكەندەرى ءۇشىن گونورار سۇرامايدى. ءار شىعارماعا ساي كيىم تىگۋ سياقتى شىعىنداردى دا وزدەرى كوتەرەدى.