ستيحيالىق ساۋدا ورىندارىن تازارتۋعا كوپ كۇش جۇمسالدى
7-8 ناۋرىزدا بۇكىل قالا بويىنشا گۇل ساتاتىن بازارلار ۇيىمداستىرىلعان، ولاردان كەيىن كوگالداردا، اركالاردا قوقىس ۇيىندىلەرى پايدا بولدى، دەپ حابارلايدى Almaty-akshamy.kz.
تۇنگى كەزەڭدە جانە 9 ناۋرىز كۇنى تاڭەرتەڭ قالالىق قىزمەتتەردىڭ بارلىق كۇشتەرى قالا اۋماعىن تازارتۋ جونىندەگى تىكەلەي مىندەتتەرىن ورىنداۋدىڭ ورنىنا ستيحيالىق ساۋدا ورىندارىن تازارتۋعا جانە وسى ۋچاسكەلەردى سانيتارلىق نورمالارعا سايكەس كەلتىرۋگە باعىتتالدى.
وسىعان بايلانىستى الماتى قالاسى كوممۋنالدىق ينفراقۇرىلىمدى دامىتۋ باسقارماسى تۇرعىندارعا كوشەدەگى تازالىقتى ساقتاۋعا شاقىردى.
«ءبىزدىڭ كوممۋنالدىق اباتتاندىرۋ قىزمەتشىلەرى قالانى تازا ۇستاۋعا تىرىسادى، ال نەمقۇرايلى قالا تۇرعىندارى ولارعا جۇمىس قوسادى. قالا اۋماعىندا جۇرگىزىلگەن كەز كەلگەن ءىس-شارالاردان، جۇمىستاردان نەمەسە ساۋدادان كەيىن، ارنايى بولىنگەن جەرلەردە تازالىق پەن ءتارتىپتى قالپىنا كەلتىرۋدى قامتاماسىز ەتۋدى سۇرايمىز»، - دەلىنگەن حابارلامادا.
اباتتاندىرۋ ەرەجەلەرىن ساقتاماعانى ءۇشىن قۇقىق بۇزۋشىلار ق ر «اكىمشىلىك قۇقىق بۇزۋشىلىق تۋرالى» كودەكسىنىڭ 505-بابىنا سايكەس اكىمشىلىك جاۋاپكەرشىلىككە تارتىلاتىنىن ەسكە سالامىز.
