گرۋزيادا 4 قىركۇيەككە دەيىن قوعامدىق كولىك قوزعالىسىنا شەكتەۋ قويىلدى.
گرۋزيا كوروناۆيرۋس جۇقتىرۋ جاعدايى ءوسىپ جاتقاندىقتان، بۇگىننەن باستاپ جاڭا شەكتەۋلەر ەنگىزەدى. وعان سايكەس، ءۇش اپتا بويى ەلدە قالالىق كولىكتەر توقتايدى، ءدامحانا مەن مەيرامحانالاردىڭ جۇمىس ساعاتى قىسقارادى، سونداي-اق فەستيۆالدەرگە تىيىم سالىنادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
14 تامىزدان 4 قىركۇيەككە دەيىن گرۋزيادا قالالىق قوعامدىق كولىكتەر (قالاارالىق كولىكتەردەن باسقا) قوزعالىسىنا شەكتەۋ قويىلدى، فەستيۆالدەر، ويىن-ساۋىق شارالارى، كونسەرتتەر مەن سپورتتىق جارىستارعا (حالىقارالىق جارىستاردان باسقا) تىيىم سالىندى. بالالار ويىن-ساۋىق ورتالىقتارىنىڭ جۇمىسىنا شەكتەۋ قويىلدى، تاماقتانۋ نىساندارى 23:00-گە دەيىن جۇمىس ىستەيدى، توي، جانازا جانە باسقا دا شارالار وتكىزۋگە بولمايدى، باقىلاۋ كۇشەيتىلەدى. مەملەكەتتىك ۆەدومستۆولار مەن جەكە كومپانيالارعا ءوز قىزمەتكەرلەرىن قاشىقتان جۇمىس ىستەۋگە كوشىرۋ تاپسىرىلدى. قالاداعى قوعامدىق كولىكتەرگە شەكتەۋ قويىلعاندىقتان، ۆاكسينا الاتىن مەكەمەلەرگە تۇراقتى كولىكتەر قاتىناماق. گرۋزيا كوروناۆيرۋستىڭ ءتورتىنشى تولقىنىن وتكەرىپ جاتىر. كۇن سايىن اۋرۋ جۇقتىرعاندار سانى تورت-بەس مىڭ ادامعا ارتۋدا. گرۋزيادا پاندەميا باستالعالى 471 مىڭ جاعداي تىركەلدى. 415 مىڭنان استامى ەمدەلىپ شىقسا، 6321 ادام كوز جۇمدى.