ءدال ءقازىر وبلىستا 19 مەكتەپكە كۇردەلى جوندەۋ جۇرگىزىلىپ جاتىر. ونىڭ 9-ى بيىلعى وقۋ جىلىنا ۇلگەرمەيدى.
الماتى وبلىسىندا جوندەۋ جۇمىستارى بىتپەگەن مەكتەپتەردىڭ وقۋشىلارى اكىمدىك، مادەنيەت ۇيىندە وقيدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بيىلعى جاڭا وقۋ جىلىندا اشىلمايتىن مەكتەپتەردىڭ ءبىرى - تالدىقورعان قالاسىنداعى وستروۆسكيي اتىنداعى مەكتەپ. بۇل ءبىلىم ورداسىندا كۇردەلى جوندەۋ جۇمىستار ماۋسىم ايىندا عانا باستالعان. مەكتەپتىڭ ءتورت قابىرعاسى تۇگەلدەي قىرىلىپ، قىزىل كىرپىش كۇيىندە تۇر. ەدەندەرىن دە تۇگەل الىپ تاستاعان. ءبىلىم باسقارماسىنىڭ ايتۋىنشا، جۇمىستار جىل سوڭىنا دەيىن اياقتالادى. سوندىقتان اتالعان مەكتەپتە وقىپ جۇرگەن 1149 بالا كۇزدە قالانىڭ ءار جەرىنە سابىلىپ، ءبىلىم الۋعا ءماجبۇر. كەيبىرى ءتىپتى كوللەدج عيماراتىندا وقيتىن بولادى.
«بىزدە تالدىقورعان گۋمانيتارلىق كوللەدج بار. ياعني، مەكتەپالدى دايارلىق توپتارى جانە ءبىرىنشى سىنىپ وقۋشىلارى سول گۋمانيتارلىق-تەحنيكالىق كوللەدجدە ءبىلىم الادى. سول جەردەن كابينەتتەر ءبولىپ وتىر. 9 مەكتەپتە كۇردەلى جوندەۋ كەش باستالۋى جانە وعان قارجىنىڭ كەش ءبولىنۋى جاعدايدى قيىنداتتى. سوندىقتان وقۋشىلارعا قولايلى جاعداي جاسالىپ، مەكتەپ بىتكەنگە دەيىن قاي عيماراتتا وقىسا، سول جەرگە جيھازدار قويىلىپ، وقۋ پروسەسسى ۇزدىكسىز وتەدى دەپ جوسپارلاپ وتىرمىز»، - دەدى الماتى وبلىستىق ءبىلىم باسقارماسى باسشىسىنىڭ ورىنباسارى ايجان ادامبەكوۆا.
سونداي-اق اقسۋ اۋدانىنىڭ ساعابۇيەن اۋىلىنداعى توقتاروۆ اتىنداعى مەكتەپكە دە كۇردەلى جوندەۋ جۇرگىزىلىپ جاتىر. جاڭا وقۋ جىلىندا بۇل مەكتەپتىڭ 172 وقۋشىسى اۋىلدىق اكىمدىكتىڭ عيماراتىندا ءبىلىم الاتىن بولادى. ال، پانفيلوۆ اۋدانىنىڭ سارىبەل اۋىلىنداعى كوبيكوۆا اتىنداعى مەكتەپتىڭ 286 وقۋشىسى وسى اۋىلدىڭ مادەنيەت ۇيىندە بارىپ ءبىلىم الادى. سونداي-اق رايىمبەك اۋدانىنىڭ تۇزكول اۋىلىنداعى مۇساقۇلوۆ اتىنداعى مەكتەپتىڭ 87 وقۋشىسى وسى اۋىلدىڭ اكىمشىلىك عيماراتىندا ءبىلىم الادى. ال تالعار قالاسىنداعى N3 مەكتەپتىڭ 1945 وقۋشىسى قونايەۆ اتىنداعى كوللەدجگە جانە ەۆرازيالىق ۋنيۆەرسيتەتكە بارىپ وقيدى.