2025 جىلعى 13-20 شىلدە ارالىعىندا تالاپكەرلەردەن گرانتتار كونكۋرسىنا قاتىسۋ ءۇشىن وتىنىشتەر قابىلدانادى.
قۇجاتتاردى egov.kz پورتالى ارقىلى ونلاين نەمەسە جوعارى وقۋ ورىندارىنداعى قابىلداۋ ورتالىقتارى ارقىلى (كەز كەلگەن جاقىن ورنالاسقان جوو-دا) تاپسىرۋعا بولادى، دەپ حابارلايدى aqshamnews.kz.
گرانت كونكۋرسىنا قاتىسۋ ءۇشىن تالاپكەرلەر جەكە كۋالىك، ۇبت سەرتيفيكاتىن، 3ح4 كولەمىندەگى فوتو، ورتا ءبىلىم تۋرالى اتتەستات (تەحنيكالىق جانە كاسىپتىك ءبىلىم بەرۋ ۇيىمدارىنىڭ تۇلەكتەرى ءۇشىن ديپلوم) تاپسىرۋ كەرەك. سونداي-اق جەڭىلدەتىلگەن سانات بويىنشا كونكۋرسقا قاتىسۋ ءۇشىن راستايتىن قۇجاتتار ۇسىنىلادى.
ۇبت شەكتى باللدارى
ءبىلىم بەرۋ گرانتتارى كونكۋرسىنا قاتىسۋ جانە اقىلى نەگىزدە وقۋعا ءتۇسۋ ءۇشىن ۇبت ناتيجەلەرى بويىنشا كەلەسى شەكتى باللدار بەلگىلەنگەن:
«قۇقىق» جانە «پەداگوگيكالىق عىلىمدار» باعىتتارى بويىنشا – كەمىندە 75 بالل؛
«دەنساۋلىق ساقتاۋ جانە الەۋمەتتىك قامتاماسىز ەتۋ (مەديسينا)» باعىتى بويىنشا – كەمىندە 70 بالل؛
ۇلتتىق جوعارى وقۋ ورىندارىنا ءتۇسۋ ءۇشىن – كەمىندە 65 بالل؛
باسقا جوعارى وقۋ ورىندارىنا ءتۇسۋ ءۇشىن – كەمىندە 50 بالل؛
قازاق ۇلتتىق سۋ شارۋاشىلىعى جانە يرريگاسيا ۋنيۆەرسيتەتىنە ءتۇسۋ ءۇشىن – كەمىندە 50 بالل.
ەستەرىڭىزگە سالا كەتسەك، جوعارى وقۋ ورىندارى ءبىلىم بەرۋ گرانتتارىن تاعايىنداۋ كونكۋرسىنا قاتىسۋ جانە اقىلى نەگىزدە وقۋعا قابىلداۋ ءۇشىن ءوز شەكتى باللدارىن وزدەرى بەلگىلەۋگە قۇقىلى.
اۋىلدىق جەرلەردەن شىققان جانە الەۋمەتتىك وسال توپتارعا جاتاتىن تالاپكەرلەردى قولداۋ ماقساتىندا قابىلداۋ ناۋقانى اياسىندا ارنايى شارالار قاراستىرىلعان. اتاپ ايتقاندا، گرانتتار كونكۋرسىنا قاتىسۋ بارىسىندا مەملەكەت بەكىتكەن كۆوتالار بار.
ايتا كەتەيىك، 2025 جىلى «سيفرلىق ۋنيۆەرسيتەت» قاعيداتىن جۇزەگە اسىرۋ جالعاسۋدا: ۇدەرىستەردىڭ باسىم بولىگى اۆتوماتتاندىرىلعان، بۇل كونكۋرستىق ىرىكتەۋدىڭ اشىقتىعىن ارتتىرادى.
ءبىلىم بەرۋ گرانتى يەگەرلەرىنىڭ ءتىزىمى 10 تامىزعا دەيىن جاريالانادى.