ۇلتتىق شۇعىل مەديسينانى ۇيلەستىرۋ ورتالىعىنىڭ (ءۇشمۇو) اشىلۋى قازاقستاندا شۇعىل مەديسينالىق كومەك كورسەتۋدى كلاستەرلىك ۇلگى بويىنشا جاڭا دەڭگەيگە كوتەرۋگە مۇمكىندىك بەردى.
كەزەك كۇتتىرمەيتىن جانە شۇعىل مەديسينالىق كومەك كورسەتۋ جۇيەسىندە بىرەگەي كوپبەيىندى اۋرۋحانا، جاڭا بورتتارى بار مەديسينالىق اۆياسيا، بۇكىل ەل بويىنشا جەدەل مەديسينالىق كومەك قىزمەتىن ۇيلەستىرۋ ورنالاسقان، دەپ حابارلايدى aqshamnews.kz.
ءۇشمۇو كوپبەيىندى اۋرۋحاناسى - 29 باعىت بويىنشا جۇمىس ىستەيتىن 9 كلينيكالىق دەپارتامەنتتى قامتيتىن 250 توسەكتىك زاماناۋي كلينيكالىق بازا: جالپى حيرۋرگيا، اكۋشەرلىك، پوليجاراقات، تەراپيا، كارديوتوراكالدىق حيرۋرگيا جانە كارديولوگيا، امبۋلاتوريالىق حيرۋرگياسى بار ۋرولوگيا، كومبۋستيولوگياسى بار ىرىڭدى-سەپتيكالىق حيرۋرگيا، گينەكولوگيا، نەيروحيرۋرگيا دەپارتامەنتى.
«ەگەر بۇرىن ەلدىڭ بارلىق شۇعىل قىزمەتتەرى شاشىراڭقى بولسا، بۇگىن ءبىز ەل بويىنشا بارلىق شۇعىل كومەكتى قاداعالاپ، ۇيلەستىرەمىز. بۇل الىس وڭىرلەردەن كەلگەن اۋىر ناۋقاستارعا جەدەل بىلىكتى كومەك كورسەتۋگە، جەرگىلىكتى جەرلەردە جەدەل جاردەم جۇمىسىنىڭ نەگىزگى كورسەتكىشتەرىن جاقسارتۋعا مۇمكىندىك بەرەدى. اعىمداعى جىلدىڭ 17 ناۋرىزىنان باستاپ ماۋسىمىنا دەيىن ءبىزدىڭ كلينيكاعا 3 مىڭعا جۋىق پاسيەنت ەمدەۋگە جاتقىزىلدى، ونىڭ 14ء-ى اقش، تاجىكستان، چەحيا، نيگەريا، كورەيا جانە قىتايدان كەلگەن شەتەلدىك ازاماتتار. بۇگىن بىزدە تاريحي وقيعا بولدى - جاڭادان اشىلعان اكۋشەرلىك بولىمشەدە العاشقى بوساندىرۋ جۇرگىزىلىپ، كاۋسار ەسىمدى قىز دۇنيەگە كەلدى»، - دەدى ق ر دسم ءۇشمۇو باسقارما ءتوراعاسى، جوعارى ساناتتى نەيروحيرۋرگ ەرجان ادىلبەكوۆ سۇحباتىندا.
اۋرۋحانا زاماناۋي مەديسينالىق جابدىقتارمەن جاراقتالعان: كومپيۋتەرلىك توموگراف (256 ءبولىم)، قۋاتى 3 تەسلا ماگنيتتىك-رەزونانستىق توموگراف، انگيوگراف، رەنتگەن جانە ۋلترادىبىستىق اپپاراتتار، 12 وپەراسيالىق زال.
سونىمەن قاتار، KINEVO 900 روبوتتى حيرۋرگيالىق بەينەلەۋ جۇيەسى بار، ول وپەراسيالاردى ورىنداۋ كەزىندە ەڭ جوعارى دالدىكتى قامتاماسىز ەتەدى جانە اناتوميالىق قۇرىلىمداردىڭ ناقتى بەينەسىن الادى جانە حيرۋرگتارعا ناۆيگاسيا ءۇشىن ناقتى كەسكىندەر مەن دەرەكتەردى بەرەتىن KICK ناۆيگاسيالىق جۇيەسى بار.
ءۇشمۇو-نىڭ بىرەگەي ەرەكشەلىكتەرىنىڭ ءبىرى - پاسيەنتتەردى ءارتۇرلى وڭىرلەردەن جەدەل تاسىمالداۋعا مۇمكىندىك بەرەتىن مەديسينالىق اۆياسياعا ارنالعان تىكۇشاق الاڭى مەن انگاردىڭ بولۋى.
2025 جىلدىڭ ءى جارتىجىلدىعىندا 1047 ۇشۋ ورىندالدى: ونىڭ ىشىندە ۇشاقتارمەن – 829، تىكۇشاقتارمەن – 218، بۇل 2024 جىلدىڭ ۇقساس كەزەڭىنەن 10،1%-عا ارتىق. سونداي-اق تۇركيا، ۆەتنام، گەرمانيا، وڭتۇستىك كورەيا جانە ەگيپەتتەن اۋىر ناۋقاستاردى 5 حالىقارالىق تاسىمالداۋ ورىندالدى.
بۇدان باسقا، قازىرگى ۋاقىتتا ءۇشمۇو بازاسىندا اكۋشەرلىك پاتولوگياسى بار ستاسيونارلار مەن سىني پاسيەنتتەردىڭ رەانيماسيا بولىمشەلەرىندەگى اۋىر جانە وتە اۋىر جاعدايداعى پاسيەنتتەرگە تاۋلىك بويى مونيتورينگ جۇرگىزەتىن تەلەمەديسينا جانە قاشىقتىقتان مەديسينالىق قىزمەتتەر كورسەتۋ ورتالىعى (احۋالدىق ورتالىق) جانە ماقساتى وقىتۋ جانە حالىقارالىق ستاندارتتارعا سايكەس كەزەك كۇتتىرمەيتىن مەديسينالىق كومەك كورسەتۋ داعدىلارىن پىسىقتاۋ بولىپ تابىلاتىن وقۋ-ترەنينگ ورتالىعى (وتو) جۇمىس ىستەيدى.
سونداي-اق، ءۇشمۇو قۇرىلىمىندا مىنالار جۇمىس ىستەيدى:
* مي قان اينالىمى ءجىتى بۇزىلعان پاسيەنتتەرگە كومەك كورسەتۋدى ءادىسنامالىق جانە ۇيىمداستىرۋشىلىق سۇيەمەلدەۋدى قامتاماسىز ەتەتىن ينسۋلت پروبلەمالارى جونىندەگى رەسپۋبليكالىق ۇيلەستىرۋ ورتالىعى؛
* زاماناۋي تەحنولوگيالاردى قولدانا وتىرىپ، جۇرەك ىرعاعىنىڭ بۇزىلۋىن دياگنوستيكالاۋعا جانە ەمدەۋگە مامانداندىرىلعان جۇرەك ىرعاعى ورتالىعى.