ۇلتتىق تەستىلەۋ ورتالىعى بيىل گرانت كونكۋرسىنا قۇجات قابىلداۋ بارىسىندا جالعان سەرتيفيكات ۇسىنعان 10 تۇلەكتى انىقتادى.
ورتالىق سەرتيفيكاتتىڭ ءتۇپنۇسقالىعىن انىقتايتىن بىرەگەي QR كودى بار ەكەنىن ەسكە سالدى، دەمەك جالعان قۇجات قالاي بولعاندا دا انىقتالادى.
مۇنداي زاڭسىز ارەكەت ءۇشىن ق ر قىلمىستىق كودەكسىنىڭ 385-بابى بويىنشا قىلمىستىق جاۋاپكەرشىلىك قاراستىرىلعان، دەپ حابارلايدى almaty-akshamy.kz.
«مىنا سەرتيفيكاتتا QR-كود اشىلمايدى، سونداي-اق ساندار ءار ءتۇرلى شريفتپەن، ءار ءتۇرلى كولەمدە جازىلعان. سەرتيفيكاتتاردى قولدان جاساۋعا تىرىسۋدىڭ بارلىق جاعدايى ءتيىستى شارالار قابىلداۋ ءۇشىن قۇقىق قورعاۋ ورگاندارىنا جولدانادى»، دەلىنگەن ۇلتتىق تەستىلەۋ ورتالىعىنىڭ حابارلاماسىندا.
ايتا كەتەيىك، ۇبت سەرتيفيكاتى app.testcenter.kz سايتىنداعى جەكە كابينەتتە، certificate.testcenter.kz سايتىندا جانە eGov ەلەكتروندىق ۇكىمەت پورتالىندا قولجەتىمدى.