پرەزيدەنت قاسىم-جومارت توقايەۆ مەملەكەتتىك قىزمەتكە كىرۋدەگى ارتىق كەدەرگىلەردى جويۋ جانە ودان شىعۋ ءتارتىبىن جەڭىلدەتۋ جونىندەگى تاپسىرما بەرگەن بولاتىن.
وسى ماقساتتا ءتيىستى زاڭناماعا وزگەرىستەر ەنگىزىلدى جانە ول ناۋرىز ايىنان باستاپ كۇشىنە ەندى، دەپ حابارلايدى Almaty-akshamy.kz 24.kz-كە سىلتەمە جاساپ.
GPA 3.33-تەن جوعارى ستۋدەنتتەر اۋداندىق جانە اۋىلدىق جەرلەردەگى تومەنگى مەملەكەتتىك لاۋازىمدارعا كونكۋرستىق نەگىزدە، ىرىكتەۋسىز تىكەلەي وتە الادى. بۇل تۇرالى ءمقىا ءتوراعاسى بۇگىن استانادا ستۋدەنتتەرمەن كەزدەسۋدە ايتتى.
ماگيستراتۋرا جانە دوكتۋرانتۋراعا گرانتقا تۇسكەن ستۋدەنتتەر وقۋلارىن بىتىرگەسىن ءبىر جىل اياسىندا اۋداندىق جانە اۋىلدىق اپپاراتقا ورنالاسا الادى. سونداي-اق 1 ناۋرىزدان باستاپ 5 مەملەكەتتىك ورگاندا، اتاپ ايتقاندا مەملەكەتتىك قىزمەت ىستەرى اگەنتتىگىندە، يندۋستريا جانە ينفراقۇرىلىمدىق دامۋ مينيسترلىگىندە، ساۋدا جانە ينتەگراسيا مينيسترلىگىندە، اقمولا وبلىسى مەن شىمكەنت قالاسىنىڭ اكىمدىكتەرىندە اپروباسيا ءجۇرىپ جاتىر. ياعني مەملەكەتتىك قىزمەت رەفورمالانۋدا.
«2019 جىلدان باستاپ پرەزيدەنتتىك جاستار كادرلار رەزەرۆىن قالىپتاستىرىپ جاتىرمىز. وسىعان بايلانىستى ءقازىر ساياسي قىزمەتتە، ا كورپۋستا، ب كورپۋستا باسشى لاۋازىمدارىندا وزدەرىنىڭ قىزمەتىن اتقارىپ جاتقان 260-تان استام ءبىزدىڭ پرەزيدەنتتىك جاستار كادرلىق رەزەرۆىنىڭ ماماندارى، جاستارىمىز بار. قازىرگى كەزدە مەملەكەتتىك قىزمەتشىلەردىڭ جاس مەملەكەتتىك قىزمەتشىلەردىڭ 38% - جاستار. سوندىقتان دا قازىرگى كەزدە جاستاردىڭ سانى ۇلعايىپ كەلە جاتىر»، - دەيدى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ.