وسىدان تۋرا ءبىر جىل بۇرىن قازاقستاننىڭ ۇلتتىق بىتىمگەرلىك كونتينگەنتى بىرىككەن ۇلتتار ۇيىمىنىڭ بولىنگەن اۋماقتى باقىلاۋ كۇشتەرى قۇرامىندا مىندەتتەردى ورىنداۋعا سيريا اراب رەسپۋبليكاسىنا جىبەرىلدى. بۇل ميسسيا قازاقستان رەسپۋبليكاسى بىتىمگەرلەرىنىڭ العاشقى دەربەس وپەراسياسى بولدى.
ءوزارا تۇسىنىستىك تۋرالى مەموراندۋمعا جانە ميسسيانىڭ مانداتىنا سايكەس، قازاقستان كونتينگەنتى وڭىردەگى تۇراقتىلىق پەن قاۋىپسىزدىكتى قامتاماسىز ەتۋدە ماڭىزدى ءرول اتقارۋدا، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
قازاقستان پرەزيدەنتى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆ بىتىمگەرلىك كۇشتەردىڭ الەۋەتىن ارتتىرۋدىڭ ماڭىزدىلىعىن ايتا كەلىپ، بۇۇ-مەن بىتىمگەرلىك سالاسىنداعى ىنتىماقتاستىق قازاقستاننىڭ سىرتقى ساياساتىنىڭ اجىراماس بولىگى ەكەنىن اتاپ ءوتتى.
فاۋار بازاسىنداعى ميسسيانى ورىنداۋ كەزىندە بىتىمگەرلىك كونتينگەنت 557 تاپسىرما ورىندادى، ونىڭ ىشىندە يزرايل مەن سيريا اراسىنداعى اتىستى توقتاتۋ تۋرالى كەلىسىمنىڭ ساقتالۋىن قاداعالاۋ، جاۋاپكەرشىلىك ايماعىنداعى بىتىمگەرلىك بازالارىنان اسكەري پەرسونالدى ەۆاكۋاسيالاۋ، باقىلاۋداعى اۋماقتى ءموبيلدى پاترۋلدەۋ، جارىلماعان وق-دارىلەردى جويۋ مەن باسقا دا جارىلعىش زاتتاردان تازارتۋ، بۇۇ-نىڭ پەرسونالى مەن جوعارى لاۋازىمدى تۇلعالارىن جاۋاپكەرشىلىك ايماعىندا جانە بۇۇ-نىڭ ونىڭ شەكتەۋلى اۋماقتارىندا الىپ ءجۇرۋ كىردى.
قازاقستاندىق بىتىمگەرلەردىڭ سيرياداعى شيەلەنىسكەن جاعدايدا وزدەرىنىڭ العاشقى دەربەس ميسسياسىن ورىنداعانى ەرەكشە ماڭىزدى. جاۋاپكەرشىلىك ايماعىندا شيەلەنىس ارتقان كەزدە قازاقستان كونتينگەنتى كوتەرىلىسشىلەردىڭ ونى باسىپ الۋىنا جول بەرمەي، بازانى بەرىك ۇستاۋدا شەشۋشى ءرول اتقاردى.
جەدەل ارەكەت ەتۋ توبى بۇۇ باسشىلىعى مەر قىزمەتكەرلەرىن داماسكىدەن "فاۋار" بازاسىنا ءۇش رەت ەۆاكۋاسيالاپ، پەرسونالدىڭ قاۋىپسىزدىگىن جانە بۇۇ مۇلكىنىڭ ساقتالۋىن قامتاماسىز ەتتى.
بىرىككەن ۇلتتار ۇيىمىنىڭ باسشىلىعى قازاقستاندىق بىتىمگەرلەردىڭ كورسەتكەن باتىلدىعى مەن تاباندىلىعىن جوعارى باعالادى.