ارۋ الماتىنىڭ مادەني ءومىرىنىڭ اجىراماس بولشەگىنە اينالىپ، تاڭدامالى تۋىندىلارىمەن كورەرمەندەرىنىڭ جۇرەگىنەن ورىن العان ع.مۇسىرەپوۆ اتىنداعى مەملەكەتتىك اكادەميالىق بالالار مەن جاسوپىرىمدەر تەاترى بيىل العاش رەت تەاتر ماۋسىمىن تاعى ءبىر ايعا ۇزارتىپ وتىر. وتاندىق تەاترلار سىندى مامىر ايىندا كورەرمەندەرىمەن «ۋاقىتشا» قوشتاساتىن ونەر ۇجىمى الماتى قالاسىنىڭ تۇرعىندارى مەن قالا قوناقتارىنا رۋحاني دەمالىس سىيلاۋ ءۇشىن بيىلعى ماۋسىمدى شىلدە ايىنىڭ ون جەتىنشى جۇلدىزىنا دەيىن جالعاستىرماق.
تەاتر ءوز رەپەرتۋارىن جىل سايىن قازاق جانە الەم ادەبيەتىندەگى وزىق دراماتۋرگيالىق شىعارمالارمەن تولىقتىرىپ، كورەرمەندەرىن سان قىرلى كەيىپكەرلەر بولمىسىمەن تانىستىرۋدا. وتاندىق جانە شەتەلدىك تەاتر فەستيۆالدەرىندە كەڭىنەن تانىلىپ جۇرگەن «قۇلاگەر» (اۆت.: ءى.جانسۇرگىوۆ، رەج.: ف.مولداعالييەۆ)، ماڭگىلىك ماحاببات جىرى «ماحاببات قىزىق مول جىلدار» (اۆت.: ءا.نۇرشايىقوۆ، رەج.: ف.مولداعالييەۆ)، ادامدار مەن جانۋارلار اراسىنداعى مەيىرىم مەن ادالدىقتى ارقاۋ ەتكەن «قارا شەكپەن» (اۆت.: گ.حۋگايەۆ، رەج.: ا.ماەميروۆ) سىندى سپەكتاكلدەر تۇراقتى كورەرمەندەرىن تاۋىپ، ءار قويىلىم كورسەتىلىمى ەرەكشە باعالاۋعا يە بولۋدا. تەاتر مەن كورەرمەن اراسىنداعى نازىك يىرىمدەرگە تولى بايلانىستىڭ اجىراماۋى ءۇشىن بارىن سالاتىن ونەر ورداسى كىشكەنتاي كورەرمەندەرىنە جاعىمدى جاڭالىقتارى مەن توسىن سىيلارىن دايىنداۋدا.
«... تەاتر دەگەن نارسە ەرمەك ەمەس، ول – ۇلگى، ول – تاربيە، ونەر ورنى» دەگەن قازاق ادەبيەتى مەن ونەرىنىڭ كورنەكتى وكىلى، قالامگەر ج.ايماۋىتوۆ پىكىرىن ەسكەرسەك، كىشكەنتاي بۋىن بالدىرعاندارىمىزدى جان-جاقتى، رۋحاني باي hءام قيال-كوكجيەگى كەڭ تۇلعا بولۋىنا ۇلەس قوسۋ دا تەاتردىڭ باستى ماقساتتارىنىڭ ءبىرى بولىپ سانالادى. بۇگىندە تەاتر رەپەرتۋارى بالالاردان باستاپ بارشا كورەرمەندەردى تەبىرەنتەتىن ادالدىق، ماحاببات، دوستىق، وتباسى قۇندىلىقتارى تاقىرىپتارىن تەرەڭ اشۋمەن قاتار ادام جانىنىڭ سان قىرلى قاتپارلارىنا ءۇڭىلىپ كەلەدى.
تەاتر ونەرى ءومىردى قالاي ءسۇرۋ كەرەكتىگىن ۇيرەتپەيدى. ول ىزگىلىك پەن ماحاببات، زۇلىمدىق پەن قيانات سەكىلدى قاسيەتتەردىڭ ايىرماشىلىعىن كورسەتەدى. زۇلىمدىقتاردى سىناي وتىرىپ، ادامدارعا ىزگىلىك جولىن كورسەتەدى ءارى سەزىندىرەدى. وسى سىندى مىندەتتەرىن ماحابباتپەن اتقاراتىن مۇسىرەپوۆ تەاترى ءوزىنىڭ بارشا كورەرمەندەرىن تاعىلىمدى قويىلىمدارىنىڭ ءقادىرلى قوناعى بولۋعا شاقىرادى! سىزدەر ءۇشىن جالعاساتىن تەاتر ماۋسىمىەىڭ قىزىقتى قويىلىمدارىنان قاپى قالماڭىزدار!