گينسبۋرگ بالالارعا ارنالعان ۆاكسينا تۋرالى ايتتى

بۇدان بۇرىن ەلىمىزدە قاي جاستاعى بالالارعا ەكپە سالىناتىنى تۋرالى جازعان بولاتىنبىز.

گينسبۋرگ  بالالارعا ارنالعان كوروناۆيرۋسقا قارسى ۆاكسينا تۋرالى ايتتى، دەپ حابارلايدى Almaty-akshamy.kz Lenta.ru سايتىنا سىلتەمە جاساپ.

ونىڭ ايتۋىنشا، COVID-19-عا قارسى بالالارعا ارنالعان ۆاكسينا Sputnik Vء-دىڭ 5 ەسە سۇيىلتىلعان  ءتۇرى ەكەن.

گامالەيا اتىنداعى ەپيدەميولوگيا جانە ميكروبيولوگيا ۇلتتىق عىلىمي ورتالىعىنىڭ ديرەكتورى الەكساندر گينسبۋرگتىڭ  ايتۋىنشا، 12 مەن 17 جاس ارالىعىنداعى جاسوسپىرىمدەرگە ارنالعان ۆاكسينانىڭ كلينيكالىق سىناقتارىنىڭ قورىتىندىسى دەنساۋلىق ساقتاۋ مينيسترلىگىندە ەكەن.

«زەرتتەۋ ناتيجەلەرى پرەپاراتتىڭ ءتيىمدى جانە ءقاۋىپسىز ەكەنىن كورسەتتى. بۇل ۆاكسينانى سالدىرعاننان كەيىن بالالاردا پايدا بولاتىن انتيدەنە كورسەتكىشى ءدال وسى ەكپەنى العان ۇلكەن ادامدارداعى انتيدەنەگە قاراعاندا  كوبىرەك بولادى»، دەپ اتاپ ءوتتى گينسبۋرگ .

ول مۇنىڭ سەبەبىن بالالارداعى يممۋندىق جۇيەنىڭ انتيگەندەرگە رەاكسياسىنىڭ كۇشتىلىگىمەن ءتۇسىندىردى.

بۇعان دەيىن گينسبۋرگ  بالالارعا ارنالعان كوروناۆيرۋسقا قارسى ۆاكسينانىڭ اتاۋىن جاريالاعان بولاتىن. ونىڭ ايتۋىنشا، پرەپارات Sputnik M  دەپ اتالۋى مۇمكىن، ونداعى «م» ءارپى «كىشكەنتايلار ءۇشىن» دەگەندى بىلدىرەدى.