بۇل تۇرعىدا بوستاندىق اۋدانىندا قانداي جۇمىستار اتقارىلۋدا؟
مۇمكىندىگى شەكتەۋلى ادامداردىڭ مۇگەدەكتىگى بار دەمەسەك، ولار دا - قوعامنىڭ تولىققاندى مۇشەسى. ولار دا جاقسى ءومىر سۇرۋگە قۇقىلى. ءتورت قابىرعاعا قامالىپ، ۇيدە وتىرىپ قالماي، باراتىن جەرىنە ەش كەدەرگىسىز، قولارباسىمەن دە، سۇيەنگەن تاياعىمەن دە ەمىن-ەركىن كىرىپ، شىعۋعا ءتيىس. بۇل تۇرعىدا شاھاردا قانداي جۇمىستار اتقارىلۋدا؟
ارينە، مۇمكىندىگى شەكتەۋلى ازاماتتاردىڭ قوعامنان تىس قالماۋىنا سوڭعى ۋاقىتتا مەملەكەت تاراپىنان ءجىتى كوڭىل بولىنۋدە. ولار ءۇشىن اينالاسىنىڭ ءبارى كەدەرگىسىز ايماققا اينالۋعا ءتيىس ەكەنىن ۇدايى ايتىپ كەلەدى.
كەشە قالاعا قاراستى بوستاندىق اۋدانى اكىمدىگىنىڭ وكىلدەرى مۇمكىندىگى شەكتەۋلى جانداردىڭ قوعامدىق بىرلەستىگىمەن بىرلەسىپ، مەگاپوليستەگى الەۋمەتتىك نىسانداردىڭ مۇگەدەكتىگى بار ادامدار ءۇشىن قانشالىقتى قولجەتىمدى ەكەندىگىن تەكسەرۋ ءۇشىن كوشپەلى مونيتورينگ جۇرگىزدى.
جالپى، بوستاندىق اۋدانىندا 8837 مۇمكىندىگى شەكتەۋلى جان تۇرادى. بيىلدان باستاپ قازىرگە دەيىن اۋداندا تۇراتىن مۇگەدەك ازاماتتارعا ارنالعان قولجەتىمدى ورتانىڭ ساقتالۋى تۇرعىسىنان الەۋمەتتىك ينفراقۇرىلىم وبەكتىلەرىن تۇگەندەۋدى (پاسپورتتاۋدى) ۇيىمداستىرۋ جانە جۇرگىزۋ جونىندەگى جۇمىس توبىنىڭ مۇشەلەرىمەن بىرلەسە 533 نىسان تولىقتاي بەيىمدەلدى جانە 566 نىسانعا پاسپورتتاۋ جۇمىستارى جۇرگىزىلگەن.
سونىمەن قاتار، بوستاندىق اۋدانىندا بيىلعا وبەكتىلەردى بەيىمدەۋ بويىنشا – 30 نىسان، پاسپورتتاۋ بويىنشا – 24 نىسان جانە اmanat پارتياسىنىڭ «وزگەرىستەر جولى: اركىمگە لايىقتى ءومىر!» اتتى سايلاۋالدى باعدارلاماسىنا سايكەس اۋداننىڭ بۇرىن ءىشىنارا بەيىمدەلگەن الەۋمەتتىك جانە كولىك ينفراقۇرىلىمى وبەكتىلەرىنە تولىق بەيىمدەۋدى جۇرگىزۋ تۇرعىسىندا 37 نىسان بولىپ بەكىتەلگەن.
سول نىسانداردىڭ ىشىندە م.ماقاتايەۆ اتىنداعى №140 مەكتەپ-گيمنازياسى دا بار. بوستاندىق اۋدانىنىڭ الەۋمەتتىك سالاعا جاۋاپتى ماماندارى، مۇمكىندىگى شەكتەۋلى جانداردىڭ مۇددەسىن كوزدەيتىن قوعامدىق بىرلەستىكتەر وكىلدەرى كىرەتىن مونيتورينگتىك توپ قۇرامى وسى ءبىلىم شاڭىراعىندا بولىپ، نىساننىڭ مۇگەدەك ازاماتتارعا قانشالىقتى قولجەتىمدى ەكەنىن تەكسەرىپ كوردى.
مەكتەپ-گيمنازيانىڭ كىرەبەرىسىنە «كومەككە شاقىرۋ تەتىگى» قوندىرىلىپتى. ياعني سىرتتان كەلىپ تۇرعان قولارباداعى ادام سول قوڭىراۋدى باسىپ، ىشتەگى قىزمەتكەرگە حابار بەرەدى دە، ءوزى پاندۋس ارقىلى كوتەرىلەدى. سونداي-اق، ەسىك اۋزىندا كوزى ناشار كورەتىن نەمەسە زاعيپ جاندارعا ارنالىپ برايل ارىپتەرى بار تاكتيلدى تاقتايشالار ورنالاستارىلعان. كوزى كورمەيتىن ادام تاقتايشانى ساۋساق ىزدەرىمەن باسۋ ارقىلى قايدا باراتىنىن ەشكىمنىڭ كومەگىنسىز بىلە الادى. اياقتىڭ استىنا توسەلگەن تاكتيلدى تەمىر پليتكالار دا كورۋ قابىلەتى ناشار نەمەسە زاعيپتاردىڭ عيمارات ىشىندەگى قوزعالىسىن جەڭىلدەتەرى ءسوزسىز. ايتپاقشى، مەكتەپ ىشىندە قۇلاعى ەستىمەيتىن بالالار ءۇشىن ارنايى ينكليۋزيۆتى كابينەت جابدىقتالعان. اسحانادا دا ەرەكشە بالاقايلار ءۇشىن بارلىق جاعداي جاسالعانىن كوردىك.
مونيتورينگتىك توپ ءبىلىم وشاعىنىڭ اجەتحاناسىن دا قاراپ شىقتى. ونداعى قول جۋعىشتىڭ، ۋنيتازدىڭ ورنالاسۋىن قارادى. ولاردىڭ جانىنا تاياقتى ءىلىپ نەمەسە بالداقتى بەكىتىپ قوياتىن امبەباپ قاۋىپسىزدىك ۇستاعىشى دا بار ەكەن. مىنە، وسى جاعدايدىڭ ءبارى مۇمكىندىگى شەكتەۋلى ازاماتتاردىڭ عيماراتقا ەشكىمگە جاعداي ايتىپ، بىرەدىڭ ۋاقىتىن الماي، ەشكىمنىڭ كومەگىنسىز، ءوزى-اق كىرىپ، شىعۋىنا مۇمكىندىك بەرەدى. قولجەتىمدى نىسان دەگەن وسى.
- ساراپشى پىكىرى
ۇلان ىڭكاربەك،
بوستاندىق اۋدانى اكىمىنىڭ مۇگەدەك جاندار ماسەلەسى جونىندەگى شتاتتان تىس كەڭەسشىسى، اۋداندىق «مۇگەدەكتەر قوعامى» قوعامدىق بىرلەستىگىنىڭ ءتوراعاسى:
– ءبىز بۇگىن قالاداعى ەڭسەلى مەكتەپتەردىڭ ءبىرىن ارالاپ شىقتىق. مۇگەدەك ادامداردىڭ كىرىپ، شىعۋىنا جاسالعان جاعداي جامان ەمەس. كوپ دۇنيە جاسالعانى كورىنىپ تۇر. كوزى كورمەيتىن جاندارعا ارنالىپ ورناتىلعان ارنايى تاقتايشالارى دۇرىس. دەگەنمەن، كىرەبەرىستەگى ۇلكەن ءدالىزدىڭ ورتاسىندا تۇرعان ۇزىن كولوننالارعا زاعيپ ادام باسىن ۇرىپ الماس ءۇشىن ارنايى بەلگى ورناتىپ قويعان دۇرىس بولار ەدى. وسى ورايدا اجەتحاناداعى ەكى كەمشىلىكتى اتاپ كەتەيىن. ۋنيتاز ءدال ورتادا ورنالاسقاندىقتان، مۇگەدەك ادامنىڭ قولارباسى جانىنا سىيمايدى. سوندىقتان ونى سول جاققا، شەتكەرىرەك جىلجىتقان دۇرىس. قوڭىراۋ تەتىگى جوعارىلاۋ قوندىرىلىپتى. ەگەر ادام عايىپتان قۇلاپ قالسا، كومەك شاقىرۋ ءۇشىن تەتىكتى باسۋعا قولى جەتپەي قالۋى مۇمكىن. اجەتحانا ءىشى كەڭ ەكەن، اينالىپ، بۇرىلۋعا قولايلى، سونىسى جاقسى ەكەن. جالپى، قالاداعى نىسانداردىڭ مۇمكىندىگى شەكتەۋلى جاندارعا قولجەتىمدى بولۋى ماقساتىندا جاسالىپ جاتقان جۇمىستارعا وڭ دەگەن باعا بەرۋگە بولادى. ءبىز كوشپەلى مونيتورينگ جۇمىسىن ودان ءارى جالعاستىراتىن بولامىز