قازاقستاندىق مۋزىكانت الىبەك قايىربەك گيمالاي تاۋلارىنداعى ەڭ بيىك نۇكتەلەردىڭ بىرىنە — تەڭىز دەڭگەيىنەن 6200 مەتر بيىكتىكتە ورنالاسقان ايلەند پيك شىڭىنا كوتەرىلىپ، سول جەردە نۇرعيسا تىلەندييەۆتىڭ كۇيىن ورىندادى، دەپ حابارلايدى aqshamnews.kz
مۇنى ول كورنەكتى قازاق كومپوزيتورىنىڭ 100 جىلدىعىنا ارناعان.
بۇل ەكسپەديسيا «دۇنيەنىڭ شىڭدارىندا دومبىرا» اتتى حالىقارالىق مادەني جوبانىڭ ءبىر بولىگى سانالادى. جوبانىڭ ماقساتى — قازاقتىڭ ءداستۇرلى مۋزىكاسىن الەمنىڭ ەڭ بيىك نۇكتەلەرىندە سيمۆولدىق تۇردە ورىنداۋ ارقىلى كەڭىنەن ناسيحاتتاۋ.
الىبەكتىڭ ايتۋىنشا، شىڭعا شىعار الدىندا ول اككليماتيزاسيا كەزەڭىنەن ءوتىپ، دايىندىق بارىسىندا بيىكتىگى 5644 مەتر بولاتىن كالا پاتتار شىڭىنا كوتەرىلگەن. بۇل جەردەن ەۆەرەست تاۋى انىق كورىنەدى.
ساپار بارىسىندا مۋزىكانت تاۋ اۋىلدارىندا، الپينيستەردىڭ بازالىق لاگەرلەرىندە جانە ءتىپتى ساگارماتحا ۇلتتىق پاركىنىڭ اۋماعىندا شاعىن كونسەرتتەر ۇيىمداستىرىپ، جەرگىلىكتى تۇرعىنداردى قازاقتىڭ دومبىراسىمەن جانە ءداستۇرلى كۇيلەرىمەن تانىستىرعان.