«Keden» جۇيەسى ۋاقىتشا ساقتاۋ قويمالارىنىڭ يەلەرىن رەەسترگە تىركەۋدى جەڭىلدەتپەك
2025 جىلعى 10 اقپاننان باستاپ زاڭدى تۇلعالار ۋاقىتشا ساقتاۋ قويمالارىنىڭ (ۋسق) يەلەرىنىڭ رەەسترىنە تىركەلۋ ءۇشىن «Keden» پلاتفورماسى ارقىلى ەلەكتروندى ادىسپەن ءوتىنىش بەرە الادى. بۇل باستاما مەملەكەتتىك كىرىستەر كوميتەتىمەن بايلانىستى جەڭىلدەتىپ قانا قويماي، جۇمىستى دا جەدەلدەتىپ، بارىنشا اشىق ەتپەك ونى. وڭىرلىك كوممۋنيكاسيالار قىزمەتىندە وتكەن پرەسس-كونفەرەنسيادا الماتىنىڭ مكد تاۋارلاردى كەدەندىك راسىمدەۋدى باقىلاۋ ءبولىمىنىڭ باسشىسى سەرىكجان احمەتجانوۆ وسىلاي دەپ حابارلادى.
«كەدەن» جۇيەسىنىڭ اقپاراتتىق پورتالى سىرتقى ەكونوميكالىق قاتىناستاردى سيفرلاندىراتىن ماڭىزدى قۇرالعا اينالىپ وتىر. ۋسق يەلەرىنىڭ رەەسترىنە تىركەلەتىن ءوتىنىشتى ەلەكتروندى تۇردە بەرۋدى مىندەتتەگەلى بەرى بۇل جۇمىس ىقشامدالىپ، جەڭىلدەپ قالعان.
ۋاقىتشا ساقتاۋ قويماسى - تاۋار اينالىمعا ەنگەنگە دەيىن نەمەسە باسقا دا كەدەندىك راسىمدەۋگە دەيىن كەدەندىك باقىلاۋدا ۇستالاتىن (ساقتالاتىن) ورىن. ۋسق يەسىنىڭ مارتەبەسىن الۋ ءۇشىن كاسىپورىن مەملەكەتتىك كىرىستەر كوميتەتىنە قارايتىن ءتيىستى رەەسترگە تىركەلۋى قاجەت.
«Keden» جۇيەسىن قولدانۋشىلار وڭاي ءوتىنىش بەرەتىن بولدى ەندى. ول ءۇشىن جەكە كابينەتكە كىرىپ، ەلەكتروندى ادىسپەن سيفرلى قول قويىپ، قاجەتتى قىزمەتتى تاڭداپ الىپ، ءوتىنىش تولتىرىپ، سوسىن كەرەك قۇجاتتاردى تىركەسە بولدى. مىندەتتى قۇجاتتارعا مىنالار كىرەدى: مەنشىك يەسى ەكەنىن كۋالاندىراتىن نەمەسە جالعا العانىن دالەلدەيتىن قۇجاتى، قويمانىڭ سحەماسى مەن جوسپارىن، قاراۋىلى بارىن، ۆيدەو باقىلاۋى بار ەكەنىن كورسەتەتىن قۇجاتتى جانە باسقا دا تەحنيكالىق قۇجاتتارىن تىركەۋى ءتيىس. ءوتىنىشتى بەرگەن ۋاقىت مەن ستاتۋسىن ونلايندا كورە الاسىز. بۇل ءوتىنىش بەرگەن جەرگە بارماي-اق قۇجات تولتىرىپ، ۋاقىت ۇنەمدەۋگە مۇمكىندىك بەرەدى.
«Keden» جۇيەسىن ەنگىزۋدىڭ ەڭ باستى ارتىقشىلىعى – جۇمىس بارىسى اشىق بولىپ، قۇجاتتى قارايتىن ۋاقىتتى قىسقارتىپ، ادام ىقپالىن ازايتادى. سەبەبى ءبارى اۆتوماتتى تۇردە ىسكە اسادى ەندى. لاۋازىم يەسىمەن بەتپە-بەت جولىقپايتىن بولعاندىقتان، بۇل جەمقورلىقتىڭ دا جولىن كەسپەك.
ۋسق يەگەرىنىڭ مارتەبەسىن العان ادام تاۋارىن كەدەندىك باقىلاۋ جۇيەسىندە ساقتاپ، لوگيستيكاعا دا ارالاسا الادى. بۇل، اسىرەسە، قويما ۇستايتىن كومپانيالارعا، كولىك-لوگيستيكا وپەراتورلارى مەن ءىرى يمپورتەرلەرگە وتە ءتيىمدى.
«Keden» جۇيەسى مەملەكەتتى سيفرلاندىرۋدى كوزدەيتىن، «قاعازباستى ەكونوميكادان» قۇتىلۋدى جوسپارلاعان ۇلكەن ستراتەگيانىڭ ءبىر بولىگى عانا. مۇنداي باستاما مەملەكەتتىك ورگانداردىڭ جۇمىسىن جەڭىلدەتىپ قانا قويماي، ونى تۇسىنىكتى ءارى ءقاۋىپسىز ەتە تۇسپەك بيزنەسكە. بۇل نارىقتىڭ بارلىق مۇشەسىنە بىردەي مۇمكىندىك بەرىپ، اكىمشىلىك جۇكتەمەنى دە ازايتادى.
قورىتا ايتقاندا، ۋسق يەلەرىنىڭ رەەستىرىنە «Keden» جۇيەسى ارقىلى ەلەكتروندى تۇردە تىركەلۋ – سيفرلىق مەملەكەتتى دامىتۋدىڭ العىشارتى. بۇل مەملەكەتتىك قاتىناسقا دەگەن سەنىمدى كۇشەيتىپ، بيزنەستى جۇرگىزۋدىڭ تيىمدىلىگىن ارتتىراتىن وسى زامانعى وزىق تەحنولوگيا. ءوتىنىشتى تەزدەتىپ تاپسىرعىڭىز كەلسە قۇجاتتارىڭىزدى كۇنى بۇرىن ازىرلەپ الىپ، ولاردىڭ رەەسترگە تىركەلۋ ءتارتىبى جازعىلعان زاڭنىڭ تالابىنا ساي كەلەتىنىن تاعى ءبىر تەكسەرىپ العانىڭىز ءجون.
مۇنداي جاڭالىق كاسىپكەرلەرگە قولايلى بولىپ، ولاردىڭ مەملەكەتتىك ورگاندارمەن اشىق ءارى ىڭعايلى جۇمىس ىستەۋىنە مۇمكىندىك بەرمەك.