گەرمانيانىڭ ەڭ ءىرى اۋەجايلارىندا 10 ناۋرىز، دۇيسەنبى كۇنى 24 ساعاتتىق ەسكەرتۋ ەرەۋىلى باستالدى.
اۋەجاي وپەراتورلارىن، جەرۇستى قىزمەتكەرلەرى مەن اۆياسيالىق قاۋىپسىزدىك قىزمەتكەرلەرىن ەرەۋىلگە شىعۋعا نەمىستىڭ Ver.di كاسىپوداعى شاقىردى، دەپ حابارلايدى aqshamnews.kz.
ەرەۋىل بەرلين-براندەنبۋرگ، شتۋتگارت، كولن/بونن، ديۋسسەلدورف، دورتمۋند، ميۋنحەن، گامبۋرگ، فرانكفۋرت-نا-ماينە، گاننوۆەر، برەمەن جانە لەيپسيگ/گاللە اۋەجايلارىن قامتىدى. ۆەسە جانە كارلسرۋە/بادەن-بادەن اۋەجايلارىندا تەك جولاۋشىلاردى، پەرسونالدى، جۇكتەر مەن تاۋارلاردى تەكسەرۋمەن اينالىساتىن اۆياسيالىق قاۋىپسىزدىك قىزمەتكەرلەرى ەرەۋىلگە شىقتى.
نەمىس اۋەجايلارىنىڭ ADV قاۋىمداستىعىنىڭ باعالاۋى بويىنشا، Ver.di ۇيىمداستىرعان ەرەۋىل 3400-دەن استام رەيستىڭ توقتاتىلۋىنا اكەلىپ، شامامەن 510 000 جولاۋشىعا اسەر ەتۋى مۇمكىن.
پروفسويۋز تالاپتارى:
• جالاقىنى 8 پايىزعا، ءبىراق ايىنا كەمىندە 350 ەۋروعا ارتتىرۋ
• قيىن جۇمىس جاعدايلارى ءۇشىن ۇستەمەاقىلاردى كوبەيتۋ
• قىزمەتكەرلەرگە قوسىمشا دەمالىس كۇندەرىن بەرۋ
Ver.di مالىمدەمەسىندە بۇل ەرەۋىل شامامەن 25 000 قىزمەتكەردىڭ ەڭبەك جاعدايىن جاقسارتۋ ءۇشىن قاجەت ەكەنى ايتىلعان.
9 ناۋرىز كۇنى، جوسپارلانعان ەرەۋىل قارساڭىندا، گامبۋرگ اۋەجايىنىڭ جەرۇستى پەرسونالى كۇتپەگەن جەردەن جۇمىسىن توقتاتتى. سونىڭ سالدارىنان 40 000 جولاۋشى زارداپ شەكتى. NDR تەلەارناسى حابارلاعانداي، كوپتەگەن جولاۋشىلار جولجۇگىن وتكىزىپ قويعاندىقتان، ونى قايتارا الماعان.
گەرمانيانىڭ اۋە قوزعالىسىن باسقارۋ قىزمەتىنىڭ مالىمەتىنشە، ادەتتە ەلدىڭ اۋەجايلارىندا كۇنىنە 6000 رەيس (ۇشىپ-قونۋ) جانە 3000 ترانزيتتىك اۋە قوزعالىسى جۇزەگە اسادى.