كورىنبەيتىن مايداننىڭ جاۋىنگەرلەرى
بۇگىن - راديوەلەكتروندى كۇرەس اسكەرلەرى ماماندارىنىڭ كاسىبي مەرەكەسى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
جەرگىلىكتى سوعىستار مەن قارۋلى قاقتىعىستاردىڭ تاجىريبەسى كورسەتكەندەي، راديوەلەكتروندى كۇرەس كۇشتەرى مەن قۇرالدارىن قولدانۋ اسكەرلەردىڭ جاۋىنگەرلىك الەۋەتىن ارتتىرىپ، جەكە قۇرام مەن جاۋىنگەرلىك تەحنيكانى جوعالتۋدى ازايتادى.
راديوەلەكتروندىق كۇرەس تە اسكەرلەردىڭ كەز كەلگەن باسقا قىزمەتى سياقتى ۇنەمى دامىپ كەلەدى. ونى جەتىلدىرۋ راديوەلەكتروندى كۇرەستى ۇيىمداستىرۋدىڭ جانە جوسپارلاۋدىڭ جاڭا تاسىلدەرى مەن ادىستەرىن تابۋدان تۇرادى. سونىمەن بىرگە جاڭا بارلاۋ قۇرالدارىنىڭ تەحنيكالىق مۇمكىندىكتەرىن تەكسەرۋ جانە كەدەرگى جاساۋ، ەلەكتروندى قورعاۋدىڭ جانە قارسىلاستىڭ بارلاۋ قۇرالدارىنا قارسى تۇرۋدىڭ ءتيىمدى ادىستەرىن پىسىقتاۋ ۇلكەن ماڭىزعا يە.
بۇل كاسىپ ارنايى مىندەتتەردى شەشۋ ءۇشىن زاماناۋي تەحنولوگيالاردى، اناليتيكالىق قابىلەتتەردى جانە جوعارى ينتەللەكتتى جاقسى مەڭگەرۋ قاجەت. سوندىقتان رەك بولىمشەلەرى ەليتالىق دەپ تانىلادى.
رەك ماماندارىن دايارلاۋ الماتىداعى راديوەلەكترونيكا جانە بايلانىس اسكەري-ينجەنەرلىك ينستيتۋتىندا جۇزەگە اسىرىلادى. ونىڭ تۇلەكتەرى راديوەلەكتروندىق جاعدايدى جەدەل باعالاۋعا، قاجەتتى ەسەپتەۋلەر جۇرگىزۋگە، سونداي-اق زاماناۋي قۇرالدار مەن كەشەندەردى شەبەر پايدالانۋعا قابىلەتتى.
اقپاراتتىق سوعىستاردىڭ مەملەكەتتىڭ تۇراقتىلىعى مەن قاۋىپسىزدىگىنە دەسترۋكتيۆتى اسەرىنىڭ ارتۋىنا بايلانىستى ق ر قارۋلى كۇشتەرىندەگى راديوەلەكتروندىق كۇرەس اسكەرلەرىنىڭ ءرولى دە ارتىپ كەلەدى.
ەشكىم راديوەلەكتروندىق كۇرەس جاريالامايدى، ءبىراق ەشقاشان توقتامايدى. ول كەڭىستىك پەن ۋاقىت شەكارالارىن بىلمەيدى. سوندىقتان بۇل سالا مامانى ءۇشىن سەكۋند سايىنعى قىراعىلىق ماڭىزدى بولىپ تابىلادى.