داۋىس بەرۋگە نيەت بىلدىرگەن قازاقستاندىقتاردىڭ 85% ءوز تاڭداۋىن جاساعان.
اراسىندا ستۋدەنتتەر، گەرمانيادا جۇمىس بابىمەن جۇرگەن ازاماتتار، ديپلوماتتار مەن ولاردىڭ وتباسى مۇشەلەرى بار. جالپى، ازاماتتارىمىز ءۇشىن ەكى ۋچاسكە جۇمىس ىستەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ونىڭ ءبىرى بەرليندەگى قازاقستان ەلشىلىگىندە، ەكىنشىسى ماينداعى فرانكفۋرت قالاسىندا ورنالاسقان باس كونسۋلدىقتا اشىلدى.
"مەن بەرليندەگى «ميراس» قازاق مادەني ورتالىعىنىڭ ءتورايىمى بولامىن. قازاقستان ءۇشىن ماڭىزدى كۇندە رەفەرەندۋمعا ازاماتتىق پارىزىمىزدى ورىنداۋعا كەلدىك. دەمالىس كۇنگە قاراماستان، وتباسىمىزبەن وسى بالالارىمىزدى بىرگە الىپ كەلىپ، ءبىزدى كورسىن، ءبىز ۇلگى بولايىق دەپ رەفەرەندۋمعا اتسالىسىپ جاتىرمىز. داۋسىمىزدى بەرىپ كەلدىك، قىزىم كومەكتەستى"، - دەيدى بەرلين تۇرعىنى اينۇر ماتايەۆا.
ال گرۋزيادا قازاقستاندىقتاردىڭ رەفەرەندۋمعا قاتىسۋى بويىنشا رەكوردتىق كورسەتكىش تىركەلدى. ستاتيستيكالىق مالىمەتتەرگە سۇيەنسەك، ەلدە جۇرگەن وتانداستارىمىزدىڭ 100 پروسەنتى داۋىس بەرگەن. گرۋزيادا ءبىر عانا داۋىس بەرۋ ۋچاسكەسى جۇمىس ىستەدى. ازاماتتىق ۇستانىمىن ءبىلدىرۋ ءۇشىن قازاقستاندىقتار ەلدىڭ ءار قيىرىنان تبليسيگە اعىلدى.
"گرۋزياداعى قازاقستان ەلشىلىگىندەگى №277 ۋچاسكەگە داۋىس بەرۋ ءۇشىن قازاقستان ازاماتتارى كەلدى. ءبىزدىڭ تىزىمدەگىلەردەن وزگە تىزىمدە جوقتارى دا بولدى، كوپ تۋريستەر باسقا قالالاردان كەلدى. بورجومي، باتۋمي قالالارىنىڭ تبيليسيدەن قانشا الىس ەكەنىن بىلەسىزدەر. سوعان قاراماستان، تاڭەرتەڭ ساعات 7-دە اشىلعاننان باستاپ كەلە باستادى. ادامداردىڭ بارلىعى 100 پايىز داۋىس بەردى. تبيليسي قالاسىندا داۋىس بەرۋ بارىسىندا مۇنداي جاعداي ءبىرىنشى رەت بولىپ تۇر. بىزدە ءبىر دە ءبىر بۇلىنگەن بيۋللەتەن جوق. بارلىعىن ساناپ شىقتىق"، - دەيدى گرۋزياداعى ق ر ەلشىلىگىندەگى №277 ۋچاسكەلىك كوميسسياسىنىڭ ءتوراعاسى جازيرا مىرزاقاسىموۆا.