قازاق مادەنيەتىن كەڭگە تانىستىرۋ جانە ناسيحاتتاۋ اياسى ۇلعايۋدا.
بەرليندە العاشقى قازاق قاۋىمداستىعى قۇرىلدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ۇيىمعا وسى ەلدە جۇمىس ىستەپ، وقۋ وقىپ جاتقان وتانداستارىمىز كىرگەن. باستاماشىلار قازاق اقىن-جازۋشىلارىنىڭ شىعارماشىلىق كەشتەرىن وتكىزىپ، وتاندىق فيلمدەر كورسەتىلىمدەرىن، سونداي-اق كورمەلەر مەن فەستيۆالدەر ۇيىمداستىرىپ، حالقىمىزدىڭ مادەنيەتى مەن ءسالت-داستۇرىن پاش ەتپەك.
ال كىشكەنتايلار ءۇشىن ارنايى باعدارلاما دايىندالىپ، دەمالىس كۇندەرى بەرليندەگى ەلشىلىكتە قازاق ءتىلى ساباقتارى ۇيىمداستىرىلادى.
دارىستەر ويىن تۇرىندە وتكىزىلەدى. قازاقستاندىق جەتكىنشەكتەردىڭ انا ءتىلىن ۇمىتپاۋى ءۇشىن ءتۇرلى شارالار ۇيىمداستىرۋ قاراستىرىلعان.
«ءبىز وسى جەردە ءوسىپ جاتقان بالالارىمىز حالقىمىزدىڭ ءسالت-داستۇرىن ءبىلىپ، انا تىلىندە جەتىك سويلەگەنىن قالايمىز. ولاردى ۇيرەتۋ - ءبىزدىڭ باستى مىندەتىمىز. كيىز ءۇي ساتىپ الىپ، جەرگىلىكتى حالىقتى ۇلتتىق تاعامىمىزبەن تانىستىرۋدى كوزدەپ وتىرمىز. سونىمەن بىرگە اقىن-جازۋشىلاردىڭ شىعارماشىلىق كەشتەرىن ۇيىمداستىرىپ، وتاندىق فيلمدەردى كورسەتۋدى قولعا الماقپىز»، - دەدى «ميراس» قازاقتار قاۋىمداستىعىنىڭ ءتوراعاسى اينۇر ماتايەۆا.