بۇل ەۋروپاداعى ەلەكتروموبيل وندىرەتىن ەڭ ءبىرىنشى كاسىپورىن.
زاۋىت قۇرىلىسىنىڭ اياقتالۋىنا وراي كومپانيا اشىق ەسىك كۇنىن ۇيىمداستىردى، دەپ حابارلايدى Almaty-akshamy.kz. «حابار 24»-كە سىلتەمە جاساپ.
كەلۋشىلەردى يلون ماسكتىڭ ءوزى قارسى الدى. شاراعا قاتىسۋشىلار ارنايى شاقىرتۋمەن كەلدى. وعان يە بولۋ ءۇشىن كومپانيانىڭ سايتىنا تىركەلۋ مىندەتتەلدى. كوروناۆيرۋستىق شەكتەۋلەرگە بايلانىستى اشىق ەسىك كۇنىنە شاقىرتۋ 9 مىڭ ادامعا بەرىلدى. ولار سۋ جاڭا زاۋىتتى ارالاپ، ەلەكتروموبيلدەردى قۇراستىرۋ پروسەسىن تاماشالادى.
ايتا كەتەيىك، بۇل ەۋروپاداعى ەلەكتروموبيل وندىرەتىن ەڭ ءبىرىنشى كاسىپورىن. وندا جىلىنا 500 مىڭ كولىك شىعارۋ جوسپاردا بار.
فابريكانىڭ ىشىندە بولدىق. روبوتتاردىڭ كولىكتى قالاي جينايتىنىن كوردىك. وتە قىزىق بولدى. تەست-درايۆپەن دە ءجۇرىپ كوردىك. سىرتتان ادەتتەگى كولىك سياقتى، ءبىراق وتە شاپشاڭ ەكەن. وكىنىشكە قاراي يلون ماسكتىڭ ءوزىن كورە الماي قالدىق. زاۋىتتىڭ ارقاسىندا ايماق ودان ءارى دامىپ، جاڭا ينفراقۇرىلىم سالىنادى دەگەن ويدامىن،-دەيدى گەرمانيا تۇرعىنى.
ەلەكتروكارمەن جۇرگەنىمە جارتى جىلدىڭ ءجۇزى بولدى. وسى ماركالى كولىكتەردىڭ فان كلۋبىندامىن. تەسلانىڭ زاماناۋي ديزاينى ەرەكشە. كولىكتە وتىرىپ فيلم كورۋگە نەمەسە ويىن ويناۋعا بولادى. مۇنداي شارانى وتكىزىپ الماۋ ءۇشىن ارنايى باۆاريادان كەلىپ ەدىم. زاۋىتتىڭ ىشىنە كىرى الماعانىم وتە وكىنىشتى.