بۇل ايتۆ-دان ايىققان ءۇشىنشى ادام
نەمىس زەرتتەۋشىلەرى 53 جاستاعى ەر ادامنىڭ ءدىڭ جاسۋشالارىن ترانسپلانتاسيالاۋدان كەيىن ايتۆ (ادامنىڭ يممۋن تاپشىلىعى ۆيرۋسى) ينفەكسياسىنان تولىق ايىققان ءۇشىنشى ناۋقاس بولعانىن مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
Nature جۋرنالىندا جاريالانعان ماقالاعا سايكەس، 2008 جىلى ايتۆ دياگنوزى قويىلىپ، «ديۋسسەلدورف پاسيەنتى» دەپ اتالىپ كەتكەن ەر ادامعا 2013 جىلى قانداعى قاتەرلى ىسىك - وتكىر ميەلويدتى لەيكوزدى ەمدەۋ ءۇشىن ترانسپلانتاسيا جاسالدى.
«ديۋسسەلدورف ۋنيۆەرسيتەتىنىڭ اۋرۋحاناسى ءتورت جىلدىق جۇيەلى باقىلاۋدان كەيىن الەمدە ايتۆ-نى ەمدەۋدىڭ العاشقى دالەلىن كەلتىرە الادى»، - دەلىنگەن زەرتتەۋشىلەردىڭ دۇيسەنبىدە جاريالانعان مالىمدەمەسىندە.
ايتۆ-دان ەمدەۋدى باستاعاننان كەيىن التى اي وتكەن سوڭ «ديۋسسەلدورف پاسيەنتىنە» جەدەل ميەلويدتى لەيكوز (جمل) دياگنوزى قويىلدى. ءبىراق كوڭىل كونشىتپەيتىن بولجامعا قاراماستان، دارىگەرلەر ەكى اۋرۋدى ءبىر ەمدەۋمەن جەڭىپ شىعۋ مۇمكىندىگىن كوردى.
ول ءۇشىن دارىگەرلەر ءقاۋىپتى اۋرۋ تۇرلەرىن ءدىڭ جاسۋشالارىن ترانسپلانتاسيالاۋ ارقىلى ەمدەۋگە شەشىم قابىلداعان، دەلىنگەن ماقالادا.
2006 جىلى «بەرليندىك پاسيەنت» دەگەن اتپەن بەلگىلى تيموتي رەي براۋن وسى ەمنەن كەيىن ايتۆ-دان ايىققان الەمدەگى العاشقى ادام بولدى. براۋن 2020 جىلى 54 جاسىندا لەيكوزدىڭ قايتالانۋىنان كەيىن قايتىس بولدى، ءبىراق ايتۆ-دان ەمدەۋ ونىڭ ءومىرىنىڭ سوڭىنا دەيىن ءتيىمدى بولدى.
ادام كاستيلەحو ەسىمدى «لوندوندىق پاسيەنت» 2017 جىلى تەراپيانى توقتاتىپ، ايتۆ-دان ايىققان ەكىنشى ادام بولدى.
ترانسپلانتاسيادان كەيىن التى جىل وتكەن سوڭ «ديۋسسەلدورف پاسيەنتى» ايتۆ-عا قارسى پرەپاراتتاردى قابىلداۋدى توقتاتتى. سودان كەيىن زەرتتەۋشىلەر پاسيەنتتىڭ قانىندا بەلسەندى ۆيرۋس بەلگىلەرى قالماعانىنا كوز جەتكىزۋ ءۇشىن اۋقىمدى سىناقتار جۇرگىزدى.
بۇل زەرتتەۋلەر ايتۆ ەمدەۋ ادىستەرىن دامىتۋدا جاقسى جەتىستىكتەردى كورسەتكەنىمەن، بۇل ەمدەۋ ستراتەگياسى حالىقتىڭ كوپشىلىگى ءۇشىن قولايلى ەمەس. بۇل - ەمدەلمەيتىن جانە ومىرگە ءقاۋىپ توندىرەتىن جاعدايلار ءۇشىن عانا قاراستىرىلاتىن وتە ءينۆازيۆتى، جوعارى تاۋەكەلدى پروسەدۋرا، دەپ اتاپ وتىلگەن زەرتتەۋدە. سونداي-اق، كوپ جاعدايدا وعان دونور تابۋ قيىن.
- قازىرگى ۋاقىتتا عىلىمنىڭ ماقساتى - الىنعان بىلىمگە نەگىزدەلگەن تاۋەكەلى از پروسەدۋرالاردى ازىرلەۋ، ايتۆ-عا قارسى ءدارىنى ادامدار ءۇشىن قولجەتىمدى ەتۋ، - دەپ قوسىپ ءوتتى ماقالا اۆتورلارى.