پاندەميا باستالعالى بەرى بۇل ەلدە 5،5 ميلليونعا جۋىق ادام ينفەكسيا جۇقتىرىپ، كوۆيدكە بايلانىستى 99 مىڭنان استام ءولىم تىركەلگەن.
وتكەن تاۋلىكتە گەرمانيادا COVID-19 اۋرۋىنىڭ رەكوردتىق سانى تىركەلدى، دەپ حابارلايدى Almaty-akshamy.kz ريا نوۆوستي اگەنتتىگىنە سىلتەمە جاساپ.
روبەرت كوح ينستيتۋتىنىڭ مالىمەتىنشە، 23 قاراشادا گەرمانيادا كوروناۆيرۋستىڭ 66 مىڭ 884 جاڭا جاعدايى انىقتالعان. جالپى، پاندەميا باستالعالى بەرى ەلدە 5،5 ميلليونعا جۋىق دەرلىك جۇقتىرۋ جاعدايى جانە ينفەكسيامەن بايلانىستى 99 مىڭنان استام ءولىم تىركەلدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، ەۋروپا قازىرگى ۋاقىتتا كوروناۆيرۋستىق ينفەكسيالار سانى بويىنشا كوش باستاپ تۇر، ولاردىڭ سانى وتكەن اپتادا 11 پايىزعا ءوستى.
بۇعان دەيىن گەرمانيانىڭ دەنساۋلىق ساقتاۋ ءمينيسترى يەنس شپان قىستىڭ سوڭىنا قاراي ەلدىڭ بۇكىل حالقى نە COVID-19-عا قارسى ۆاكسينا الادى، نە ينفەكسيانىڭ اۋىر سالدارىمەن بەتپە-بەت كەلەتىنىن ايتتى.
«مۇمكىن، قىستىڭ سوڭىنا قاراي، مىسقىلمەن ايتىلىپ جۇرگەندەي، گەرمانيانىڭ ءار تۇرعىنى ۆاكسيناسيالانادى، ەمدەلەدى نەمەسە ولەدى»، - دەپ بولجادى ول. شپان ءالى كۇنگە دەيىن مىندەتتى ۆاكسيناسيا يدەياسىن قولدامايتىنىن اتاپ ءوتتى، ونىڭ ايتۋىنشا، بۇل ۇجىمدىق يممۋنيتەتتىڭ پايدا بولۋىن جەدەلدەتە المايدى.
13 قاراشادا ەل بيلىگى 12 مىڭ اسكەردىڭ بيىلعى جىلدىڭ سوڭىنا دەيىن كوروناۆيرۋستىڭ ءتورتىنشى تولقىنىمەن كۇرەسۋگە جۇمىلدىرىلاتىنىن حابارلادى. اتاپ ايتقاندا، اسكەريلەر نەمىس كلينيكالارىندا لوگيستيكالىق قىزمەت كورسەتەدى جانە ۋاقىتشا اۋرۋحانالار سالادى.