ەلوردا ءماسليحاتىنىڭ دەپۋتاتتارى 7 مەكتەپكە قازاق زيالىلارىنىڭ ەسىمىن بەرۋ تۋرالى شەشىم قابىلداپ، رەسپۋبليكالىق ونوماستيكالىق كوميسسياعا ۇسىنىس جولدادى، دەپ حابارلايدى almaty-akshamy.kz قازاقپاراتقا سىلتەمە جاساپ.
قالالىق ءماسليحاتتىڭ كەزەكتەن تىس سەسسياسىندا «نۇر-سۇلتان قالاسىنىڭ كەيبىر ءبىلىم بەرۋ ۇيىمدارىنا اتاۋ بەرۋ تۋرالى ماسەلەسى داۋىسقا سالىندى. اتالعان ماسەلە بويىنشا شەشىم جوباسىن ءماسليحات دەپۋتاتتارىنا قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپوۆ تانىستىردى. جوبادا ەلورداداعى 7 ءبىلىم بەرۋ ۇيىمىنا قازاقتىڭ تانىمال تۇلعالارىنىڭ ەسىمىن بەرۋ ۇسىنىلعان.
ولار: №11 مەكتەپ-ليسەيگە كورنەكتى مەملەكەت قايراتكەرى، عالىم، ەتنوگراف وزبەكالى جانىبەكوۆتىڭ ەسىمىن بەرۋ؛
№60 مەكتەپ-گيمنازياعا ارحەولوگ، تاريح عىلىمدارىنىڭ دوكتورى، بەلگىلى اكادەميك كەمەل اقىشيەۆتىڭ ەسىمىن بەرۋ؛
№2 بالالار مۋزىكا مەكتەبىنە كۇمىس كومەي ءانشى، قازاقستاننىڭ حالىق ءارتىسى، حالىق قاھارمانى، كەلەر جىلى تۋعانىنا 100 جىل تولاتىن روزا باعلانوۆانىڭ ەسىمىن بەرۋ؛
№3 بالالار مۋزىكا مەكتەبىنە ايگىلى وپەرا ءانشىسى، پەداگوگ، پروفەسسور ەرمەك سەركەبايەۆتىڭ ەسىمىن بەرۋ؛
№66 مەكتەپ-ليسەيگە كورنەكتى مەملەكەت قايراتكەرى، قازاقستاندى شيرەك عاسىرعا جۋىق ۋاقىت باسقارعان دىنمۇحامەد قونايەۆتىڭ ەسىمىن بەرۋ؛
№83 مەكتەپ-گيمنازياعا قازاقتىڭ اسا كورنەكتى اعارتۋشى پەداگوگى، جازۋشى، ەتنوگراف، فولكلورشى ىبىراي ءالتىنساريننىڭ ەسىمىن بەرۋ؛
№77 مەكتەپ-گيمنازياعا اقىن، حالىق جازۋشىسى، جۋرناليست، قازاقستاننىڭ ەڭبەك سىڭىرگەن قايراتكەرى فاريزا وڭعارسىنوۆانىڭ ەسىمىن بەرۋ.
«10 قاراشادا وتكەن نۇر-سۇلتان قالاسى ونوماستيكا كوميسسياسىنىڭ كەزەكتى وتىرىسىندا ەلوردامىزداعى ءبىرقاتار ءبىلىم بەرۋ ۇيىمدارىنا اتاۋ بەرۋ جونىندەگى ۇسىنىستار تالقىلانىپ، قولداۋ تاپقان بولاتىن. وسىعان وراي سىزدەردىڭ قاراۋلارىڭىزعا «نۇر-سۇلتان قالاسىنىڭ كەيبىر ءبىلىم بەرۋ ۇيىمدارىنا اتاۋ بەرۋ تۋرالى» قالا اكىمدىگىنىڭ قاۋلىسى جانە قالالىق ءماسليحاتتىڭ شەشىم جوباسى ەنگىزىلىپ وتىر. كورسەتىلگەن جوبا ق ر قولدانىستاعى زاڭناماسىنا قايشى كەلمەيدى جانە نورماتيۆتىك-قۇقىقتىق اكتىلەرگە قويىلاتىن تالاپتاردى بۇزبايدى. ۇسىنىس قولداۋ تاپقان جاعدايدا اكىمدىك پەن ءماسليحاتتىڭ بىرلەسكەن قاۋلىسى مەن شەشىمى ق ر زاڭناماسىندا بەلگىلەنگەن ءتارتىپ بويىنشا ق ر ۇكىمەتى جانىنداعى رەسپۋبليكالىق ونوماستيكا كوميسسياسىنىڭ قاراۋىنا ەنگىزىلەدى»، - دەدى ساكەن ەسىركەپوۆ.
ءماسليحات دەپۋتاتتارى شەشىم جوباسىن ءبىراۋىزدان ماقۇلداپ داۋىس بەردى. بۇل ۇسىنىستى رەسپۋبليكالىق ونوماستيكا كوميسسياسى ماقۇلداسا، ءتيىستى ۇكىمەت قاۋلىسى شىعىپ، ەلورداداعى 7 مەكتەپ جاڭا اتاۋعا يە بولادى.