استانادا قازاقستان ۇلتتىق وليمپيادالىق كوميتەتىنىڭ پرەزيدەنتى گەنناديي گولوۆكين، قاتار ۇوك باسشىسى، ۇلتتىق وليمپيادالىق كوميتەتتەر قاۋىمداستىعىنىڭ ۆيسە-پرەزيدەنتى شەيح دجوان بين حاماد بين حاليفا ال-تانيمەن رەسمي كەزدەسۋ وتكىزدى.
سونداي-اق رەسمي ءىس-شاراعا ازيا وليمپيادالىق كەڭەسىنىڭ باس ديرەكتورى جانە World Aquatics ۇيىمىنىڭ پرەزيدەنتى حۋسەين ءال-مۋساللام، ق ر تۋريزم جانە سپورت ءمينيسترى ەربول مىرزابوسىنوۆ، قازاقستان ۇوك باس حاتشىسى ءالىمجان اقايەۆ جانە قازاقستان سۋ سپورتى تۇرلەرى فەدەراسياسىنىڭ پرەزيدەنتى نۇرلان جاقىپوۆ قاتىستى، دەپ حابارلايدى aqshamnews.kz ۇوك-كە سىلتەمە جاساپ.
كەزدەسۋ بارىسىندا ازيا وليمپيادالىق كەڭەسى مەن قازاقستان اراسىنداعى ىنتىماقتاستىق، وليمپيادالىق قوزعالىستى دامىتۋ جانە بىرلەسكەن جوبالاردى جۇزەگە اسىرۋ ماسەلەلەرى، ونىڭ ىشىندە بيىل استانادا وتەتىن قۇرلىقتىق سپورتشىلار فورۋمىن ۇيىمداستىرۋ جايى تالقىلاندى.
اتالمىش فورۋمعا ازيانىڭ 45 ەلىنەن سپورتتىق كوميسسيالاردىڭ وكىلدەرى، سونداي-اق حالىقارالىق وليمپيادالىق كوميتەتى (حوك) مەن ازيا وليمپيادالىق كەڭەسىنىڭ جەتەكشىلەرى قاتىسادى دەپ جوسپارلانىپ وتىر.
تاراپتار قازاقستان مەن قاتار ۇوك اراسىنداعى ارىپتەستىكتى كەڭەيتۋگە جانە World Aquatics ۇيىمىنىڭ قازاقستان سۋ سپورتى تۇرلەرى فەدەراسياسىمەن ىنتىماقتاستىعىن نىعايتۋعا باسا نازار اۋداردى.
كەزدەسۋ قورىتىندىسى بويىنشا تاراپتار حالىقارالىق سپورتتىق ىنتىماقتاستىقتى دامىتۋعا قىزىعۋشىلىعىن ءبىلدىرىپ، جوسپارلانعان باستامالاردى جۇزەگە اسىرۋ بويىنشا الداعى ناقتى قادامداردى كەلىسىپ الدى.