الماتى قالاسىندا قازاقستان رەسپۋبليكاسىنىڭ كورنەكتى اسكەري جانە قوعام قايراتكەرى، گەنەرال-مايور امىربەك ءانۋار ۇلى توگىسوۆكە ارنالعان مەموريالدىق تاقتانىڭ اشىلۋ ءراسىمى ءوتتى.
الماتى قالاسىنىڭ تورىندەگى (م.تولەبايەۆ كوشەسى، 172ء-ۇي، شيەۆچەنكو كوش. قيىلىسىندا) 1998-2020 جىلدارى ءوزى تۇرعان ءۇيدىڭ جانىندا وتكەن ەسكە الۋ شاراسىنا امىربەك ءانۋار ۇلىنىڭ قىزمەتتەس بولعان جولداستارى، كورشىلەرى، تۋعان-تۋىستارى جانە ب ا ق وكىلدەرى قاتىستى، دەپ حابارلايدى aqshamnews.kz.
تاعزىم ەتۋ شاراسىندا قازاقستان رەسپۋبليكاسى ۇلتتىق ۇلانى №5571 اسكەري ءبولىمىنىڭ اسكەري وركەسترى قازاقستان رەسپۋبليكاسىنىڭ مەملەكەتتىك ءانۇرانىن ورىندادى.
بۇل جايدان-جاي ەمەس. سەبەبى، امىربەك ءانۋار ۇلى بۇكىل سانالى عۇمىرىن قازاقستاننىڭ قارۋلى كۇشتەرىنە ارناعان ەرەن تۇلعا. ول 1990 جىلدارى ەلىمىزدىڭ ىشكى اسكەرى مەن قارۋلى كۇشتەرىنىڭ قالىپتاسۋىنا، دامۋىنا تىكەلەي اتسالىستى. ءتىپتى، ەلىمىزدەگى العاشقى اسكەري بۇيرىقتىڭ تۇجىرىمداماسىن جازىپ شىققان. سونداي-اق، جاستاردى اسكەري-پاتريوتتىق رۋحتا تاربيەلەۋ جۇيەسىنىڭ نەگىزىن قالاۋشىلاردىڭ ءبىرى بولدى.
قىزمەت جولىندا ماگادان، امۋردەگى كومسومول، قاراعاندى، اتىراۋ (گۋريەۆ)، ماسكەۋ، الماتى جانە استانا قالالارىندا اسكەري مىندەتىن ابىرويمەن اتقارىپ، قاراپايىم ساربازدان گەنەرال-مايور دارەجەسىنە دەيىن كوتەرىلدى.
امىربەك توگىسوۆ فەرعانا وڭىرىندە، تاۋلى قاراباق پەن بالتىق جاعالاۋىنداعى ايماقتاردا بولعان توتەنشە جاعدايلاردا قوعامدىق ءتارتىپتى ساقتاۋ شارالارىنا قاتىسقان.
1992 جىلى ماسكەۋدە، كسرو ىشكى ىستەر مينيسترلىگىنىڭ ىشكى اسكەرلەر باس باسقارماسىندا قىزمەت ەتىپ جۇرگەن جەرىنەن تۋعان ەلىنە ورالىپ، قازاقستان رەسپۋبليكاسى ىشكى اسكەرى قولباسشىسىنىڭ ورىنباسارى بولىپ قىزمەت ىستەدى. 1996 جىلعا دەيىن اتالعان قۇرىلىمدى قالىپتاستىرۋ مەن دامىتۋعا بەلسەنە اتسالىستى. سول ەڭبەگى ءۇشىن وعان 1996 جىلى گەنەرال-مايور اسكەري اتاعى بەرىلدى.
1997 جىلى پرەزيدەنت جارلىعىمەن قازاقستان رەسپۋبليكاسى قورعانىس ءمينيسترىنىڭ ورىنباسارى بولىپ تاعايىندالدى. بۇل قىزمەتتە ءجۇرىپ، امىربەك توگىسوۆ ەلىمىزدىڭ حالىقارالىق اسكەري ارىپتەستىگىن نىعايتۋعا ەلەۋلى ۇلەس قوستى.
ول بۇۇ وتىرىسىندا بىتىمگەرشىلىك قىزمەت تۋرالى بايانداما جاساپ، قازاقستاننىڭ بەدەلىن الەم الدىندا تانىتا ءبىلدى. سونداي-اق، العاشقى «سەنترازبات-97» بىتىمگەرشىلىك وقۋ-جاتتىعۋىن ۇيىمداستىرۋ مەن وتكىزۋگە بەلسەنە قاتىستى.
گەنەرال-مايور توگىسوۆتىڭ ەرەن ەڭبەگى لايىقتى باعالانىپ، بىرنەشە مەدالدار مەن «ايبىن» وردەنىنىڭ يەگەرى اتاندى.