الماتى قالاسىنىڭ اكىمى دارحان ساتىبالدى №4 قالالىق كلينيكالىق اۋرۋحانانىڭ قابىلداۋ بولىمىندەگى قايتا جاڭعىرتۋ جۇمىستارىنىڭ بارىسىمەن تانىستى. بۇل - تاۋلىك بويى ۇزدىكسىز قىزمەت كورسەتەتىن، الماتىداعى ماڭىزدى كوپسالالى مەديسينالىق مەكەمەلەردىڭ ءبىرى.
قابىلداۋ بولىمىنە تاۋلىگىنە ورتا ەسەپپەن 250-300 ناۋقاس تۇسەدى. جىلىنا كلينيكادا 12 500-گە دەيىن وتا جاسالادى. مۇندا 260 دارىگەردى قامتىعان جالپى سانى 1118 قىزمەتكەر جۇمىس ىستەيدى.
جاڭعىرتۋ جوباسى جالپى اۋدانى 7 مىڭ شارشى مەترگە جۋىق 5 ءبولىم مەن 4 بلوكتى قامتيدى. نەگىزگى ماقسات - قابىلداۋ ءبولىمىن كەڭەيتۋ، حالىقارالىق triage-سۇرىپتاۋ جۇيەسىن ەنگىزۋ، جاڭا وپەراسيالىق زالداردى اشۋ، 12 توسەكتىك شۇعىل واريت ءبولىمىن قۇرۋ، سونداي-اق وڭىرلىك تراۆماتولوگيا جانە ورتوپەديا ورتالىعىن قالىپتاستىرۋ. قايتا جاڭعىرتۋدى اياقتاۋ مەرزىمى - 2026 جىلعى اقپان دەپ بەلگىلەنگەن.
قۇرىلىس بارىسىندا مەديسينالىق مەكەمەنىڭ ۇزدىكسىز جۇمىس ىستەۋىن قامتاماسىز ەتۋ باستى نازارعا الىنعان. بۇل ءۇشىن وقشاۋلانعان جەلدەتۋ جۇيەسى، ناقتى دەمونتاجدى باقىلاۋ، انگيوگرافقا ارنالعان «جاسىل ءدالىز» جانە دياگنوستيكالىق قىزمەتتەرگە جەكە قولجەتىمدىلىك قاراستىرىلعان.
الماتى قالاسىنىڭ اكىمى دارحان ساتىبالدى مەردىگەر ۇيىمدارعا بارلىق كەزەڭدەردە جوعارى ساپانى قامتاماسىز ەتە وتىرىپ، بەلگىلەنگەن مەرزىمدەرگە قاتاڭ ءمان بەرۋدى تاپسىردى.
جۇمىس ساپارى اياسىندا قالا اكىمىنە ونكولوگيالىق ورتالىقتىڭ قازىرگى جاعدايى تۋرالى باياندالىپ، 250 توسەك-ورىندىق كوپسالالى اۋرۋحانا مەن ءبىر اۋىسىمدا 350 كەلۋشىنى قابىلداي الاتىن كەڭەس-دياگنوستيكالىق ورتالىقتىڭ قۇرىلىس جوباسى ۇسىنىلدى.
جىل سايىن ونكولوگيا ورتالىعىنا كەلەتىن ناۋقاستار سانى وسۋدە. سوڭعى التى جىلدا ەم العاندار سانى ەكى ەسەگە ارتىپ، 12 مىڭنان 24 مىڭ ادامعا جەتتى. وسىعان بايلانىستى جاڭا زاماناۋي ونكوورتالىق سالۋ قاجەتتىلىگى تۋىنداپ وتىر.
قالا اكىمى دارحان ساتىبالدى بەيىندى ينفراقۇرىلىمدى دامىتۋ مەن حالىققا جوعارى تەحنولوگيالىق مەديسينالىق كومەكتىڭ قولجەتىمدىلىگىن ارتتىرۋدىڭ ماڭىزدىلىعىن اتاپ ءوتتى.