گازدالعان سۋ ءقاۋىپتى مە؟

الەۋمەتتىك جەلىلەردە بالالاردىڭ گازدالعان سۋدان ۋلانۋى تۋرالى فەيك اقپارات تارالۋدا

WhatsApp-تا «تارحۋن» سۋسىنىن ءىشىپ، ۋلانعان بالانىڭ قايتىس بولعانى جانە باسقا بالالاردىڭ گازدالعان سۋسىنداردان قاتتى ۋلانىپ قالعانى تۋرالى فەيك اقپارات تاعى دا تارالدى. ق ر دسم سانيتاريالىق-ەپيدەميولوگيالىق باقىلاۋ كوميتەتى بۇل اقپاراتتى تەرىسكە شىعارىلدى.

حابارلامادا «تارحۋن» جانە «سيترو» گازدالعان سۋسىندارى عانا ەمەس، سونىمەن قاتار «M&M’S» دراجەسى، «Milky way» شوكولادى، «ديۋشەس» جانە «بارباريس» كامپيتتەرى جانە باسقا دا ءبىرقاتار تاعامدار ءقاۋىپتى دەپ تانىلعانى ايتىلعان.
ق ر دسم سانيتاريالىق-ەپيدەميولوگيالىق باقىلاۋ كوميتەتى تىزىمدەگى بىردە-بىر ءونىم ءقاۋىپتى دەپ تانىلماعانىن، سونداي-اق قازاقستاندا گازدالعان سۋسىننان قاتتى ۋلانۋ جاعدايلارى تىركەلمەگەنىن حابارلادى.

«ق ر دسم سانيتاريالىق-ەپيدەميولوگيالىق باقىلاۋ كوميتەتى الەۋمەتتىك جەلىلەردە تارالعان ازىق-تۇلىك ونىمدەرى تۋرالى اقپارات فەيك دەپ تانىلىپ، شىندىققا سايكەس كەلمەيتىنىن حابارلايدى. سوندىقتان جالعان اقپارات تاراتپاۋلارىڭىزدى سۇرايمىز، رەسمي اقپارات كوزدەرىنەن الىنعان اقپاراتتى پايدالانۋعا شاقىرامىز»، – دەپ حابارلادى ۆەدومستۆودان.

گازدالعان سۋسىن ءىشىپ، ۋلانعان بالالار تۋرالى حابارلاما رەسەيلىك قولدانۋشىلار اراسىندا 2019 جىلى تارالعان.
كەيىن قازاقستانعا جانە باسقا دا ەلدەرگە جەتتى. ءار جولى حابارلاما تەرىسكە شىعارىلىپ، «تارحۋن» سۋسىنىنان قاتتى ۋلانۋ جاعدايلارى تىركەلمەگەنى حابارلاندى.