قازاقستاننىڭ اتى اڭىزعا اينالعان عارىشكەرى، اۆياسيا گەنەرال-لەيتەنانتى، حالىق قاھارمانى تالعات مۇسابايەۆتى اقتىق ساپارعا شىعارۋ ءراسىمى 6 تامىزدا الماتىدا وتەدى، دەپ حابارلايدى اqshamnews.kz.
بۇل تۋرالى الماتى قالالىق "قارۋلى كۇشتەر ارداگەرلەرى" رەسپۋبليكالىق قوعامدىق بىرلەستىگىنىڭ فيليالى حابارلادى. ءراسىم ساعات 09:00-دە وفيسەرلەر ۇيىندە باستالادى. قوشتاسۋدان كەيىن 28 گۆاردياشى-پانفيلوۆشىلار اتىنداعى ساياباقتا ميتينگ ۇيىمداستىرىلادى. تالعات امانگەلدى ۇلى كەنساي زيراتىنا جەرلەنەدى.
ەلگە ەڭبەگى سىڭگەن عارىشكەر
تالعات مۇسابايەۆ 1951 جىلى 7 قاڭتاردا الماتى وبلىسى جامبىل اۋدانىنىڭ قارعالى اۋىلىندا دۇنيەگە كەلگەن. ول – تەحنيكالىق عىلىمدار دوكتورى، 1994، 1998 جانە 2001 جىلدارى عارىشقا ءۇش رەت ۇشقان كاسىبي عارىشكەر.
2007-2016 جىلدار ارالىعىندا قازاقستاننىڭ ۇلتتىق عارىش اگەنتتىگىنىڭ ءتوراعاسى قىزمەتىن اتقاردى. كەيىن، 2017-2023 جىلدارى قازاقستان رەسپۋبليكاسى پارلامەنتى سەناتىنىڭ دەپۋتاتى بولدى.
ەسكە سالايىق، پرەزيدەنت قاسىم-جومارت توقايەۆ اتى اڭىزعا اينالعان ۇشقىش-عارىشكەردىڭ دۇنيەدەن وزۋىنا بايلانىستى كوڭىل ايتتى.