جۇمىس ساپارى بارىسىندا وقۋ-اعارتۋ ءمينيسترى عاني بەيسەمبايەۆ الماتى قالاسىنداعى ءرفمم-نىڭ جۇمىسىمەن تانىستى.
50 جىلدىق تاريحى بار رەسپۋبليكالىق مەكتەپتەن ەلىمىزگە بەلگىلى مىقتى ماتەماتيكتەر، ساياساتكەرلەر، عالىمدار، سونداي-اق حالىقارالىق وليمپيادالاردىڭ بىرنەشە دۇركىن جەڭىمپازدارى شىققان.
2024 جىلدىڭ قورىتىندىسى بويىنشا رفمم ءتۇرلى حالىقارالىق جانە كونتينەنتتىك وليمپيادالاردا 67 مەدال جەڭىپ الدى، ونىڭ ىشىندە الەم وقۋشىلارى اراسىنداعى توپ-7 پاندىك وليمپياداعا كىرەتىن IMO، IPhO جانە IOI سەكىلدى ءىرى دودالاردا ءتورت مەدال يەلەنگەن. جۇلدەگەرلەر ىشىندە ءامىرلان امانجولوۆ، دىنمۇحامەد ەگەۋبايەۆ، مارعۇلان نۇرساعاتوۆ، ءىلياس قازىمبەك جانە ماكسيم سوي بار. بۇدان باسقا 2005 جىلدان باستاپ رفمم ق ر وقۋ-اعارتۋ مينيسترلىگىنىڭ قولداۋىمەن جانە 15 ەلدىڭ وقۋشىلارىنىڭ قاتىسۋىمەن ماتەماتيكا، فيزيكا جانە ينفورماتيكا پاندەرىنەن حالىقارالىق جاۋتىكوۆ وليمپياداسىن وتكىزىپ كەلەدى.
«پرەزيدەنتىمىزدىڭ، ۇستازدارىمنىڭ جانە اتا-انامنىڭ قولداۋى ماعان سەنىمدىلىك پەن كۇش-قۋات بەرەدى. بولاشاقتا ەلىمىزدىڭ وركەندەۋىنە، وتاندىق عىلىمنىڭ دامۋىنا ءوز ۇلەسىمدى قوسقىم كەلەدى»، - دەيدى IMO كۇمىس جۇلدەگەرى ءامىرلان امانجولوۆ.
ءوز كەزەگىندە مينيستر مەملەكەت تاراپىنان وسكەلەڭ ۇرپاقتىڭ تولىققاندى دامۋىنا بارلىق جاعداي جاسالىپ جاتقانىن اتاپ ءوتتى. پرەزيدەنتتىڭ باستاماسىمەن 2022 جىلدان باستاپ حالىقارالىق پاندىك وليمپيادالاردىڭ جەڭىمپازدارى مەن جۇلدەگەرلەرىنە جانە ولاردى دايىنداعان پەداگوگتەرگە اقشالاي سىياقى بەرىلىپ كەلەدى.
«سىزدەر - ەلىمىزدىڭ ماقتانىشى عانا ەمەس، ۇزدىكسىز دامۋعا ۇمتىلعان جانە نەگىزىن ءبىلىم مەن ىلىمنەن الاتىن زيالى ۇلتتىڭ بولاشاق وكىلىسىزدەر. سىزدەردىڭ قول جەتكىزگەن جەتىستىكتەرىڭىز قاتارلاستارىڭىزعا ۇلگى بولىپ قانا قويماي، بيىك بەلەستەرگە تالپىنۋعا شابىت بەرەدى. مەملەكەت سىزدەرگە تولىققاندى قولداۋ كورسەتىپ، ءارى قاراي وسۋلەرىڭىز، دامۋلارىڭىز ءۇشىن قاجەتتى جاعدايدى جاسايدى. سىزدەردىڭ ءبىلىم الۋعا جانە ونى جەتىلدىرە تۇسۋگە دەگەن ۇمتىلىستارىڭىز تۇتاس ۇلت ءۇشىن قوزعاۋشى كۇشكە اينالاتىنىنا سەنىمدىمىن»، - دەدى عاني بەيسەمبايەۆ.
كەزدەسۋدە وقۋشىلار مينيسترگە ءوز سۇراقتارىن قويىپ، ارمان-تىلەكتەرىمەن، ماقساتتارىمەن ءبولىستى. اتاپ ءوتۋ كەرەك، 2024 جىلى ءبىزدىڭ وقۋشىلارىمىز حالىقارالىق وليمپيادالاردا 563 مەدال جەڭىپ الدى، ونىڭ ىشىندە 77 التىن بار. سونداي-اق قازاقستاندىق وقۋشىلار الەمنىڭ روبوتوتەحنيكادان ءۇش دۇركىن، حيميادان ەكى دۇركىن چەمپيونى بولىپ تابىلادى.
سونىمەن قاتار مينيستر رفمم فيليالىنىڭ عيماراتىن رەكونسترۋكسيالاۋ جۇمىسىنىڭ بارىسىمەن تانىستى.